बरिष्ठ संगितकार अमर गुरुङको निधन भएको छ । नेपाली राष्ट्रिय गानका संगीतकार तथा संगीत तथा नाट्य प्रज्ञा प्रतिष्ठानका प्रथम कुलपति गुरुङको ७९ बर्षको उमेरमा आज बिहान निधन भएको छ । उहाँको निधनको चिकित्सकले बिहानमात्रै पुष्टि गरेका छन् । उहाँका छोरा राजु गुरुङले बिहान उपचारका क्रममा निधन भएको जानकारी दिनुभयो ।
ग्रान्डी अन्तर्राष्ट्रिय अस्पतालको सघन उपचार कक्ष (आईसीयू) मा उपचाररत गुरुङको बिहान २ बजेर ३७ मिनेटमा निधन भएको छोरा राजुले बताउनुभयो । उहाँको शवलाई श्रद्धान्जलीका लागि प्रज्ञाभवनमा राख्ने तयारी भइरहेको छ । अहिले अस्पतालमा ठूलो भीड लागेको छ ।
खानेकुरा खानेबित्तिकै बान्ता भइहाल्ने समस्या भएपछि गुरुङलाई गत सोमबार ग्रान्डी अन्तर्राष्ट्रिय अस्पताल ल्याइएको थियो । सन् १९३८ मा भारतको दार्जिलिङमा जन्मे गुरुङले नेपाली संगीतक्षेत्रको उत्थानका लागि महत्वपूर्ण योगदान दिएका छन् ।
राष्ट्रिय गानका संगीतकार गुरुङले सयौंको संख्यामा लोकप्रिय र कालजयी नेपाली गीतहरुमा स्वर तथा संगीत भरेका छन् ।
