रोशन पोखरेल
रौतहट, भदौ २२ – पूर्व प्रधानमन्त्री तथा नेकपा एमालेका वरिष्ठ नेता माधव कुमार नेपालले मुलुकको आन्तरिक बिषयलाई छिमेकी राष्ट्र वा बाहिरी शक्ति समक्ष सुनाउँदा देशको बेइज्जती भइरहेको बताउनुभएको छ । उहाँले आन्तरिक विषयलाई बाहिर सुनाउने काम तुरुन्त बन्द गरी सहमति कायम गर्न तर्फ वर्तमान सरकार अघि बढ्नु पर्ने बताउनुभएको छ । मुलुक भित्र सिर्जना भएका अधिकारका कुरा लगायत विभिन्न आन्तरिक समस्यालाई बाहिरी शक्तिहरु समक्ष पेश गर्दा आफ्नै देशको बेइज्जती भइरहेकोले चिन्ता लागेको भन्दै उहाँले उक्त कार्यहरु तत्काल बन्द गरी दलहरु बिच एकता कायम गर्न सरकार क्रियाशिल भएर अगाडी बढ्नु पर्ने बताउनुभएको हो । वरिष्ठ नेता नेपालले देश विकासका लागी राजनीतिक दलका प्रतिनिधि पार्टीगत स्तर भन्दा माथि उठेर एक जुट हुनु पर्ने जोड दिनुभयो । विकास निर्माणका लागि सबै राजनीतिक दल बिच सहकार्य हुन जरुरी रहेको भन्दै नेता नेपालले राजनीतिक भागबण्डाले गर्दा नै देश विकास हुन नसकेको आरोप लगाउनुभयो । जनस्तर सम्म पुग्नु पर्ने विकासका पूर्वाधारहरु अझै अधुरो रहेको, सडक र यातायातमा अझै पनि नेपाल पछाडी रहेकोले जीवनस्तर सँग जोडिएका पूर्वाधार विकासका लागि सबैसँग सहकार्य आवश्यक रहेको नेता नेपालले स्पष्ट पार्नुभयो । बुधबार जापान सरकारको ९७ लाख र जनश्रमदान बाट जुटाइएको झण्डै २४ लाख रुपैयाँ गरी कुल एक करोड एक्काइस लाखको लागतमा निर्माण भएको सामुदायिक भवनको नेता नेपाल र जापानी राजदूत मासासी ओगावाले संयुक्त रुपमा उद्घाटन गरेका हुन् । नेता नेपालले छिमेकीहरुको सहयोगले नेपालका विभिन्न आयोजनाहरु सम्पन्न भएको स्मरण गर्दै आगामी दिनमा पनि जापानको सहयोगको रौतहटका बासिन्दाले अपेक्षा गरेको बताउनुभयो । कार्यक्रममा नेता नेपालले चिनिया राष्ट्रपति सी जिङपिङको नेपाल भ्रमण स्थगन भएको खबर दुःखद भएको उहाँले बताउनुभयो । भ्रमणका बारेमा आधिकारिक जानकारी आफूलाई नभएको तर भ्रमण रद्दहुन नदिन सरकारले यथोचित पहल गर्नु पर्ने उहाँले बताउनुभयो । कार्यक्रममा जापानी राजदूत मासासी ओगावाले नेपाल जापान सम्बन्ध निकै पुरानो भएको र रौतहटलाई सहयोग गर्न पाउदा खुसी लागको बताउनुभयो ।
