बढ्यो पेट्रोलियम पदार्थको मूल्य, पेट्रोलमा प्रतिलिटर ३ र डिजेलमा ५ रुपैयाँ वृद्धि

काठमाडौं । नेपाल आयल निगमले पेट्रोलियम पदार्थको मूल्य वृद्धि गरेको छ। निगमले सोमबार बिहानदेखि लागू हुने गरी पेट्रोल, डिजेल, मट्टीतेल तथा हवाई इन्धनको नयाँ मूल्य निर्धारण गरेको हो।

निगमका अनुसार, पेट्रोलको मूल्य प्रतिलिटर ३ रुपैयाँ तथा डिजेल र मट्टीतेलको मूल्य प्रतिलिटर ५ रुपैयाँले बढाइएको छ।

त्यसैगरी, आन्तरिक हवाई इन्धनको मूल्य प्रतिलिटर २० रुपैयाँले वृद्धि गरिएको छ भने अन्तर्राष्ट्रिय हवाई इन्धन (काठमाडौंका लागि) को मूल्य प्रतिकिलोलिटर १३१ अमेरिकी डलरले बढाइएको निगमले जनाएको छ।

नयाँ मूल्यअनुसार पेट्रोलको खुद्रा बिक्री मूल्य पहिलो वर्गका लागि प्रतिलिटर १९७ रुपैयाँ ५० पैसा, दोस्रो वर्गका लागि १९९ रुपैयाँ र तेस्रो वर्गका लागि २०० रुपैयाँ कायम गरिएको छ।

नेपाल आयल निगमले संशोधित मूल्य सोमबार बिहानदेखि लागू भएको जनाएको छ।