भोटेकोशी बाढी प्रभावित व्यवसायीलाई राहत प्याकेज, नाडाद्वारा स्वागत

काठमाडौँ । भोटेकोशी नदीमा आएको विनाशकारी बाढीबाट प्रभावित उद्योग ,व्यापार तथा व्यवसायको पुनरुत्थानका लागि सरकारले ल्याएको राहत प्याकेजलाई नाडा अटोमोबाइल्स एसोसिएसन अफ नेपाल (नाडा)ले स्वागत गरेको छ।

सरकारले बाढी प्रभावित निजी क्षेत्रलाई लक्षित गर्दै भन्सार तथा कर छुट,कर्जा पुनर्सरचना तथा पुनर्तालिकीकरण,ब्याजमा सहुलियत ,थप कर्जा तथा बीमा दाबी भुक्तानी सहज बनाउने व्यवस्था गरेको बताइएको छ । नाडाले यी निर्णयले विपद बाट प्रभावित व्यवसायलाई तत्काल राहत दिनुका साथै पुनः सञ्चालनको वातावरण बनाउन सहयोग पुग्ने जनाइएको छ।

बाढीका कारण पूर्णरुपमा क्षतिग्रस्त वा बगाएर हराएका व्यवसायिक सवारीसाधन तथा ढुवानीका साधन पुनः आयात गर्दा भन्सार महसुल छुट दिने निर्णयले अटोमोबाइल तथा ढुवानी व्यवसायीलाई ठुलो राहत पुग्ने नाडाको भनाइ छ । क्षतिग्रस्त मेसिनरी तथा उपकरण पुनः आयातमा दिइएको सहुलियत पनि पुनः स्थापनाका लागि महत्वपुर्ण रहेको नाडाले जनाएको छ।

नाडा अध्यक्ष सुरेन्द्रकुमार उप्रेतीले सरकारको कदम सकारात्मक रहेको बताउँदै निर्णयको शीघ्र,सरल र प्रभावकारी कार्यान्वयनका लागि सम्बन्धित निकायलाई आग्रह गरेका छन् । त्यस्तैगरी वास्तविक क्षतिको अध्ययन गरी आवश्यकता अनुसार दास्रो चरणको पुनरुत्थान प्याकेजसमेत ल्याउन नाडाले सरकारसँग आग्रह गरेको बताइएको छ।