नेपाल विद्युत प्राधिकरण गौर शाखाबाट गएको चुहावट नियन्त्रण टोलीले विद्युत चोरी गर्दै गरेको अवस्थामा ९ जनालाई पक्राउ गरेको छ । प्राधिकरणको कर्मचारी सहित नेपाल प्रहरी, सशस्त्र प्रहरीको संयुक्त सहभागिता रहेको चुहावट टोलीले गौर नगरपालिका वार्ड नम्बर १०, ११ र १२ मा विहानै छापामारी गरी तिनीहरुलाई पक्राउ गरेको हो । हुकिंग गरी विद्युत चोरी गरिरहेको अवस्थामा सबैलाई पक्राउ गरिएको नेपाल विद्युत प्राधिकरणले जनाएको छ ।
विद्युत चोरीको अभियोगमा पक्राउ परेका स्थानीय किसुन राय, गंगा राय यादव, ओम प्रकाश साह, शेख आलम, भागरीथ साह, विशुन साह, राजेन्द्र राम, राजू साह र शेख वाजुललाई जिल्ला प्रहरी कार्यालयमा राखिएको प्राधिकरणले जनाएको छ । रौतहटको ग्रामीण भेगका गा.वि.सहरुमा व्यापक रुपमा विद्युत चुहावट भईरहदा पनि सम्बधित निकायले रोकधाम गर्न सकेका छैन ।
आफ्नो झुठो धाक जमाई राख्न प्राधिकरणले सदरमुकामको केही वार्डमा मात्र अभियान चलाउने गरेको पाईन्छ । सदरमुकामकै वार्ड न १२ सिर्सियामा दिउसै हुकिगं गरिएको भेटिन्छ । एक स्थानीयका अनुसार असी प्रतिशत घरमा हुकिंगबाटै माध्यमबाट हिटर, हिटर चुल्हो, मोटर, लगायतका बढी क्षमतायुक्त ईलेक्ट्रोनिक्स समानहरु प्रयोग गरिन्छ । यति हुदा हुदै प्राधिकरणको टोली उता नपुग्नु कुनै आश्चर्यको कुरा हैन । प्राधिकरणमा कार्यरत कर्मचारीहरु प्राय त्यही क्षेत्रका रहेका छन त्यही भएर उता चुहावट नियन्त्रण गर्ने आट कल्ले गर्छन । त्यसमा पनि गौर शाखा प्रमुख बेमौसमी बाजा झै प्राय कार्यालयबाट गायब रहेपछि रामभरोसे प्राधिकरण चलिरहेको छ । प्राधिकरण रहेकै ठाउँ चुहावट मुक्त बनाउन कार्यालय प्रमुखले न त कुनै योजनै बनाएका छन न त यसका लागि समय । स्थानीय उर्जा राज्यमंत्रीले जिल्लालाई चुहावट मुक्त बनाउन दिशा निर्देश दिए पनि यसको कार्यन्वय नहुनुमा कार्यालय प्रमुखको क्षमता माथि प्रश्न चिन्ह खड़ा गरेको छ ।
