काठमाडौं, ३ फागुण। उपप्रधान तथा गृहमन्त्री विमलेन्द्र निधिले अपराध नियन्त्रण तथा शान्ति सुरक्षा कायम गर्नर कानुनी शासनको पालनामा कसैसंग कुनै संझौता नगरी दृढतापूर्बक काम गर्न सुरक्षा निकायका प्रमुखहरुलाई निर्देशन दिएका छन्।

मंगलबार दिउँसो गृहसचिब सहित तीनवटै सुरक्षा निकायका प्रमुखहरुलाई सिंहदरबारस्थित आफ्नै कार्यकक्षमा डाकेर मन्त्री निधिले यस्तो निर्देशन दिएका हुन्।

हिजोमात्र नयाँ जिम्मेवारीमा पाउनु भएका नेपाल प्रहरीका निमित्त महानिरीक्षक डा. दिनेशचन्द्र पोखरेल र सशस्त्र प्रहरी महानिरीक्षक सिंहबहादुर श्रेष्ठलाई निबर्तमान नेतृत्वले गरेको कामलाई निरन्तरता दिन पनि उनले निर्देशन दिए।

सीमा सुरक्षा र आन्तरिक सुरक्षा चुनौतीलाई ध्यानमा राखेर काम गर्न पनि उनले तीनवटै सुरक्षा निकायका प्रमुखहरुलाई निर्देशन दिए।

सुन तस्करी, लागू औषध एवं सामाजिक र आर्थिक अपराध नियन्त्रणमा कडाई गर्न पनि गृहमन्त्री निधिले नयाँ जिम्मेवारी संहालेको नेतृत्वलाई निर्देशन दिए।

यसैबीच, गृहमन्त्री निधिले नागरिकता संशोधन सम्बन्धी बिधेयक र बिपद् व्यबस्थापन सम्बन्धी बिधेयक यथाशीघ्र पेश गर्न गृहसचिब लोकदर्शन रेग्मीलाई निर्देशन दिएका छन्।

उनले बिगतमा मधेशी मोर्चासंग भएको सहमति अनुसार मुद्धा फिर्ताको प्रकृया तत्काल टुङ्याउँन पनि सचिब रेग्मीलाई निर्देशन दिए।