साउदी स्थित कम्पनीबाट सप्तरीको कुसाहका सुरज रामलाई कागजात खोसेर निकालिएको छ । बिरामी भएर काममा जान नसकेका सुरजलाई साउदीको प्रोजेक्ट लिंक कम्पनीले कागजात खोसेर कामबाट निकालेको हो । कम्पनीले बिना जानकारी एक हप्ता सम्म काममा नआएको भन्दै कामबाट निकालेको हो भने सुरजले बिरामी भएकाले जान नसकेको बताउनुभयो ।

सुरज तीन महिना पहिले ८० हजार रुपैयाँ तिरेर हेल्परको काममा साउदी जानुभएको हो तर उहाँलाई जाने बेला म्यानपावर कम्पनीले सञ्चार कम्पनी हो, इन्जिनियरसँग डुल्नुपर्छ भनेको थियो । त्यहाँ पुगेपछि सुरजले बेल्चा चलाउनु पर्‍यो । १ हजार रियाल तलव भनेर गएका सुरजले तलव भने एक महिनाको १ हजार रियाल नै बुझ्नु भयो । सुरजले काम गाह्रो भएकाले आफू विरामी भएको र कम्पनीका कर्मचारीलाई जानकारी गराएको बताउनु भयो । मेडिकल डाक्टरले नियमित औषधी खान र रेष्ट गर्न भने पछि सुरज क्याम्पमै बस्नु भएको थियो ।

कम्पनीले ५ दिन पहिले निकाले पछि आफूले खान नपाएको र अहिले अर्कै कम्पनीको क्याम्पमा नेपाली साथीहरुसँग बसिरहेको बताउनु भयो । उहाँले भन्नुभयो, ‘दिनभरि बाहिर बस्छु रात परे पछि साथीको कोठामा जान्छु ।’ कम्पनीलाई घर फर्काइदे भन्दा २० हजार रियाल मागेको सुरजले बताउनु भयो । अकामा कार्ड बनाउन र सुरजलाई साउदी लाँदा २० हजार रियाल खर्च भएको भन्दै कम्पनीले त्यो पैसा नदिए सम्म घर पनि नपठाउने, काम पनि नलगाउने र कागजात पनि नदिने बताएको सुरजले दुखेसो पोख्नु भयो ।