काठमाडौं, १ भदौ । रियल मड्रिडका फरवार्ड क्रिष्टियानो रोनाल्डोले आफूमाथि पाँच खेलको प्रतिबन्ध लगाउने निर्णय अत्याचार रहेको बताएका छन् ।
रोनाल्डोमाथि स्पेनिस सुपर कप फुटबलको पहिलो लेग अन्तर्गत बार्सिलोनासँगको खेलमा दोहोरो पहेँलो कार्ड पाएपछि मैदानबाट बाहिरिने क्रममा रेफ्रीलाई धकेलेको आरोपमा पाँच खेलको प्रतिबन्ध लगाउने निर्णय भएको हो ।
आइतबार राति भएको बार्सिलोनासँगको खेलमा पाएको रातो कार्ड विरुद्ध रोनाल्डोले अपिल गरेका छन् । रोनाल्डोले रातो कार्ड विरुद्ध अपिल गरेपछि आफ्नो इन्स्टाग्राममा गरेको पोस्टमा आफूलाई रेड कार्ड दिने र थप चार खेलको प्रतिबन्ध लगाउने निर्णय हाँस्यास्पद र अत्याचार पूर्ण रहेको उल्लेख गरेका छन् ।
रोनाल्डोमाथि पाँच खेलको प्रतिबन्ध
दोहोरो पहेँलो कार्डका कारण रोनाल्डोमाथि स्वतः एक खेलको प्रतिबन्ध लागेको हो । यस्तै मैदानबाट बाहिरिने क्रममा रेफ्री रिकार्डो डि बुर्गोसलाई धकेलेकाले रोनाल्डोमाथि थप चार खेलको प्रतिबन्ध लागेको हो ।
रोनाल्डोले गोल गरेर त्यसको सेलिब्रेसनका लागि जर्सी फुकालेकाले पहिलो पहेँलो कार्ड पाएका थिए । त्यसको केही मिनेटपछि स्यामुएल उमटिटीसँगको ट्याकलका लागि उनले दोस्रो पहेँलो कार्ड पाएका थिए । ३२ वर्षका रोनाल्डोले आउँदो बुधबार राति भएको दोस्रो लेग गुमाइसकेका छन् ।
रोनाल्डोको अपिल खारेज भएमा उनले स्पेनिस ला लिगा तथा अरु घरेलु प्रतिस्पर्धाका चार खेल गुमाउने छन् । तर उनले च्याम्पियन्स लिगका खेल भने खेल्न पाउने छन् । प्रतिबन्ध कार्यान्वयन भएमा रोनाल्डो सेप्टेम्बर २० मा रियल बेटिससँगको खेलमा मात्रै मैदानमा हुनेछन् ।
प्रतिबन्ध कार्यान्वयन भएमा रोनाल्डोले ला लिगाको नयाँ सिजनका चार खेल गुमाउने पर्नेछ । उनले डिप्रोटिभो ला कोरुना, भ्यालेन्सिया, लेभान्टे र रियल सोसिडाडसँगको खेल गुमाउने सम्भावना छ ।
एजेन्सीको सहयोगमा
