अर्जुननरसिंहविरुद्ध विवेकशील साझा पार्टीबाट युवा नेता अधिकारी लड्दै

काठमाडौं, १२ कार्तिक । आगामी मंसिर १० र २१ गते हुने प्रदेश र प्रतिनिधि सभाको निर्वाचनको लागि हालै जन्मिएको विवेकशील साझा पार्टीले देशैभरि आफ्ना उम्मेद्धवारहरु उठाएको छ ।नुवाकोटको क्षेत्र नम्बर २ मा कांग्रेसका पूराना तथा चर्चित नेता अर्जुनरसिंह केसीविरुद्ध विवेकशील–साझाले नयाँ युवा उम्मेद्धवार उठाएसँगै चुनावी भीडन्त रोचक बनेको छ । केसीविरुद्ध पुरुषोत्तम अधिकारी उठाएको साझा पार्टी आफ्ना उम्मेद्धवारले चुनाव जित्नेमा ढुक्क छ ।

स्रोतका अनुसार युवा नेता अधिकारी यसअघि पनि राजनीतिमा सक्रिय थिए । उनले नेपाली कांग्रेसको भातृ संगठन नेपाल विद्यार्थी संघबाट राजनीति सुरु गरेका हुन् ।

तारकेश्वर गाँउपालिका वडा नम्बर २ जन्मिएका अधिकारी पछिल्लो समय पत्रकारितामा समेत क्रियाशील छन । रिपोटर्स क्लब नेपालमा रहेर काम गरेको लामो अनुभव भएका अधिकारी रिपोटर्स क्लब नुवाकोट शाखाका पूर्व अध्यक्ष पनि हुन।

०४६ को जनआन्दोलनमा नेपाल विद्यार्थी संघको तर्फबाट उनले अग्रपँक्तिमा रहेर सक्रिय भूमिका निर्वाह गरेको भन्दै कांग्रेस शीर्ष नेताहरुले उनलाई मुक्तकण्ठले प्रशंसा गरेका थिए ।वि.सं. २०५४ मा नेबिसघको जिल्ला सह–सचिव, २०५८ ने.का.नुवाकोट नीति तथा कार्यक्रम उपसमिति सदस्य, २०६२ नेपाल किसान संघ नुवाकोटको उपसभापति भएर काम गरेको र कांग्रेस पार्टी भित्रको निश्कलंक पात्र हुन ।

पार्टीको शक्ति केन्द्रको नजिक हुँदा पनि कहिल्यै कुनै लाभको लालचा राखेनन्। नेपाल रेडक्रस सोसाईटीको आजीवन सदस्य, ग्रामीण विकास मञ्चका संस्थापक अध्यक्ष, भ्रष्टाचार विरुद्धको आन्दोलनका समेत उनी अभियन्ता हुन् ।

नयाँ वैकल्पिक धारको खोजीमा विवेकशील साझा पार्टी नुवाकोटका सदस्य समेत रहेका उनले स्नातक तहसम्म अध्ययन गरेका छन् । अधिकारी पछिल्लो समय मुलुकमा संस्थागत हुँदै गरेका भ्रष्टाचार र लुटतन्त्रका जराहरुलाई केन्द्रदेखी गाँऊसम्म उखेल्ने तथा समृद्ध नेपाल बनाउने सपना बोकेर अग्रसर छन् ।