नम्रताको एक्सन अवतारमा ‘जाइरा’को लुक्स सार्वजनिक

काठमाडौँ ,

अभिनयलाई जीवन्त दिन निकै मेहनत गर्ने अभिनेत्री नम्रता श्रेष्ठको फिल्म ‘जाइरा’को लुक्स सार्वजनिक गरिएको छ । कपाल काटेर नम्रता एक मार्शल आर्ट्स प्लेयरको भूमिकामा जीवन्त देखिने प्रयास गरेकी छिन् । एक्सन जनराको यस फिल्ममा नम्रताका साथमा अनुप बिक्रम शाही, रेमनदास श्रेष्ठ, सिर्जना रेग्मी, प्रमोद अग्रहरी, सम्राट मगर, सुजिता श्रेष्ठको अभिनय रहेको छ ।

मङ्गलबार एक कार्यक्रममा फिल्मको टिमले नम्रताको लुक्सका साथै भिन्न तरिकाले फिल्मको झलक झल्काउने किसिमले फिल्मको फस्ट लुक्सलाई सार्वजनिक गरेको छ । उक्त कार्यक्रममा नेपाल चलचित्र संघका अध्यक्ष प्रदीप कुमार उदय, चलचित्र बिकास बोर्डकि अध्यक्ष निकिता पौडेलले शुभकाना प्रदान गरे ।

आशुतोष राज श्रेष्ठको निर्देशनमा बनेको ‘जाइरा’ आउँदो मंशिर १४ गतेबाट प्रदर्शनमा आउने कुरा पनि त्यसै कार्यक्रममा मार्फत सार्वजनिक गरियो । कार्यक्रममा बोल्दै निर्देशक श्रेष्ठले ‘जाइरा’ बनाउँदा सबै कुराले सन्तुष्ट भए पनि प्राविधिक कुराको तवरले अलिक नेपालमा राम्रो सिनेमा बनाउन अप्ठेरो भएको गुनासो पोखे ।

त्यस्तै नायिका नम्रता श्रेष्ठले फिल्ममा काम गर्दा ६ महिनाको प्रशिक्षण लिएको र शुटिंगको दौरान शारीरिक रुपमा निकै कठिन भएको र फिल्ममा निकै मेहनत गरेको बताइन ।

‘जाइरा’लाई ट्रेन्ड सिटर्स प्रा.लि. र हाईलीहाईले निर्माण गरेको हो भने फिल्ममा निर्देशक श्रेष्ठकै कथा, प्रसन्न गोपालीको कार्यकारी निर्माण, कल्याण सिंह, टम्ब्लीविड र डिजे राजुको संगीत, सम्राट बस्नेतको द्वन्द निर्देशन, केशव थापाको नृत्य निर्देशन, लोकेश बज्राचार्यको सम्पादन, बाबु श्रेष्ठको छायांकन रहेको छ ।