स्थानीय तहको चुनाव भएको एक वर्ष पुगी सक्दा पनि सरकारले कर्मचारी खटाउन नसक्दा नवलपरासी पश्चिम जिल्लाका विभिन्न स्थानीय तहको काममा समस्या भएको छ । कर्मचारी नहुँदा जिल्लाका ४ गाउँपालिका र ३ नगरपालिकामा समस्या भएको हो ।
प्रतापपुर गाउँपालिकामा वडा सचिव देखि महिला तथा बालबालिका , शिक्षा लगाएतका प्राविधिकहरुको अभाव हुँदा सेवाग्राहीमा सेवा पुग्न सकेको छैन । वडा कार्यालयमा वडा सचिव र प्राविधिक नहुँदा सेवा लिन समस्या हुने गरेको स्थानीयवासीन्दा युवराज मौर्याले गुनासो गर्नु भयो । वडा सचिवको दरबन्दी पूरा हुन नसकेपछि एउटै सचिवले दुई वटा वडाको काम गर्नुपर्ने बाध्यता रहेको प्रमुख राजकुमार शर्माले बताए । गाउँपालिकाबाट पारित योजनाहरुलाई कार्यान्वयनको लागि जनशक्ति अभावले समस्या भएको उनले बताए ।
सरकारले समायोजन र कार्यक्षेत्रमा रहेका कर्मचारी नपठाएकोले समस्या झन बढ्दै गएको प्रमुख प्रशासकीय अधिकृत बोधराज बस्यालले बताए । लेखापाल, प्राविधिक, कार्यालय सहयोगी र अन्य शाखामा कर्मचारीको समस्या छ । अन्य गाउँपालिकामा समेत कर्मचारीको अभाव रहेको जिल्ला समन्वय समिति प्रमुख शिवशंकर प्रसाद रायले बताए । रायले सरकारले असोज महिना भित्र सबै गाउँपालिकामा कर्मचारी पुग्ने अाशा समेत गरे ।
