नेपाल प्रहरीले भीमदत्त नगरपालिका–२ उल्टाखामकी १३ वर्षिया निर्मला पन्तको बलात्कार र हत्यामा संलग्न व्यक्तिको खोजी गर्न सक्ने सम्भावना प्रतिदिन क्षीण हुँदै गइरहेको छ ।
बलात्कारी र हत्यारा खोज्न असफल हुने देखिएपछि प्रहरीको उच्च नेतृत्वले घटनाका बेला जिम्मेवारीमा रहेका प्रहरी अधिकारी र अनुसन्धानमा संलग्न प्रहरीमाथि भने कडा कारबाही गर्ने तयारी गरेको छ । नेपाल प्रहरीको उच्च नेतृत्वले निर्मला हत्याकाण्डमा संलग्न अपराधीको खोजी गर्न औपचारिक र अनौपचारिक टोलीहरु खटाए पनि ती टोलीले घटनाको भेउसमेत पाउन नसकेका प्रहरी स्रोतको कथन छ । औपचारिक रुपमा अनुसन्धान गरिरहेको कञ्चनपुर प्रहरी र प्रहरी प्रधान कार्यालयबाट घोषित अघोषित रुपमा खटाइएका अन्य टोली सबै रनभुल्लमा परेको अवस्था आएको सो स्रोतको ठम्याई छ । औपचारिक अनुसन्धानका लागि तोकिएका अनुसन्धान अधिकृत डिएसपी कृष्ण ओझाले सञ्चारमाध्यमलाई अनुसन्धान चलिरहेको जवाफ दिने गरेका भए पनि उनले घटना सम्बन्धमा कुनै नयाँ तथ्य फेला पार्न सकिरहेका छैनन् ।
प्रधान कार्यालयले खटाएकी एसपी दुर्गा सिंह चन्दले पनि हत्यारासम्म पुग्ने सूत्र नपाएको जानकारी प्राप्त भएको छ । वास्तविक बलात्कारी र हत्यारा पत्ता लगाउन चाहिने कुनै प्रमाण बाँकी नरहेका कारण प्रहरीले जनमतलाई आफ्नो पक्षमा पार्न बलात्कारी–हत्यारा पत्ता लगाउने भन्दा अनुसन्धानमा संलग्न प्रहरीलाई कारबाही गर्नेतर्फ आफ्नो ध्यान केन्द्रीत गरेको छ । निर्मलाको भजाइनल स्वाबमा बलात्कारीको डिएनए नै नपाइएको पनि संकेत प्राप्त भएको छ । बलात्कारीको डिएनए पाइए– नपाइएको बारेमा मानसखण्डले सोधेको प्रश्नमा अतिरिक्त महानिरीक्षक धिरु बस्न्यातले उत्तर दिन मानेनन् । यो प्रश्नको उत्तरले अनुसन्धानमा कुनै असर नपार्ने भए पनि एआइजी बस्न्यातले मुख खोलेनन् । बलात्कारीको डिएनए सुरक्षित नभएकै कारण प्रहरीले संदिग्घहरुको डिएनए परीक्षण गर्ने क्रम रोकेको बुझिएको छ । यसअघि प्रहरीले एसपी डिल्लीराज विष्ट समेत पाँचजनाको डिएनए परीक्षण गरेको थियो ।
त्यो जनआक्रोश शान्त पार्न प्रहरीले मञ्चन गरेको नाटक मात्रै भएको आशंका गरिएको छ । निर्मलाको स्वाबमा बलात्कारीको डिएनए भेटिएको भए प्रहरीले अन्य संदिग्घलाई पनि डिएनए परीक्षणको घेरामा तान्ने थियो । तर, अहिले प्रहरीका उच्च अधिकृतहरु स्वाब र त्यसमा पाइएको डिएनए बारे ठोस रुपमा बोल्न चाहदैनन । यसबाट केन्द्रीय विधि विज्ञान प्रयोगशालामा पठाइएको स्वाबमा बलात्कारीको डिएनए नपाइएको संकेत प्राप्त भएको हो । नयाँ तथ्य फेला पार्न नसकेका प्रहरी अनुसन्धानकर्ताहरु शव पाइएको स्थल उखुबारीमैं निर्मलाको बलात्कार र हत्या भएको निष्कर्षमा पुग्न थालेका देखिएको छ । शव पाइएको अघिल्लो दिन अर्थात् साउन १० मा घटनास्थल नजिकै दिउँसो करिब चार बजे निर्मलाको साइकल देखिएको भन्दै उनीहरु त्यस्तो निष्कर्ष दिन थालेको बताइएको छ । तर, उनीहरुले नभिजेका निर्मलाका कापीकिताब र पोष्टमार्टम रिपोर्टअनुसार निर्मलाको फोक्सोमा माटो र पानी नभेटिएको तथ्यतर्फ भने ध्यान दिइरहेको छैनन् । निर्मलाको बलात्कार र हत्या उखुबारीमैं भएको सावित गर्न केही अनलाइनमार्फत् समाचार प्रकाशन पनि गरिएका छन् ।
प्रहरीको गुटबन्दीमा सामेल पत्रकारहरुले आफू आवद्ध अनलाइनमा त्यस आशयका समाचार पनि लेखिरहेका छन् । निर्मला हत्याकाण्डको प्रारम्भिक अनुसन्धानमैं त्रुटी गरेको आरोपमा निलम्बित एसपी डिल्लीराज विष्ट र वडा प्रहरी कार्यालयका तत्कालिन इन्चार्ज जगदिश भट्टलाई प्रहरी प्रधान कार्यालयले वर्खास्त गर्न सिफारिस गरिसकेको छ । उनीहरुलाई गृहसचिवले केही दिनभित्रै वखाृस्त गर्ने सम्भावना छ ।विष्ट र भट्टबाहेकका निलम्बित प्रहरीलाई पनि वर्खास्त गर्न एआइजी धिरु बस्न्यातको छानविन समितिले सिफारिस गरेको जानकारी प्राप्त भएको छ । सिफारिस अनुसार अन्य प्रहरी पनि वर्खास्त हुने सम्भावना देखिएको छ ।
लालीगुरास बाट
