भारतको टेलिभिजन शोमा धमाका गर्दै नेपाली बालक आयुष र प्रितम

काठमाडौं । रियालिटि शो ‘सारेगमप लिटल च्याम्स’ को नयाँ एपिसोड फ्रेब्रुअरी ९ बाट सुरु भएको छ । १६ वर्ष भन्दा कम उमेरका बालबालिकाको लागि बनेको गायन रियालिटि शोमा नेपालका दुई बालकहरु पनि सहभागी भएका छन् । इटहरीका प्रितम आचार्य अनि भक्तपुर बस्ने सिन्धुपाल्चोकका आयुष केसी टप ३० मा परिसकेका छन् ।

को हुन् आयुष केसी
हाल भक्तपुर बस्ने आयुष केसी ११ वर्षका भए । उनी यो भन्दा पहिला कान्तिपुर टेलिभिजनबाट प्रशारण हुने रियालिटि शो ‘सुरशाला जुनियर आइडल’ भइसकेका छन् । सानैबाट संगीतमा रुचि राख्ने आयुष तीन वर्षको उमेरदेखि गीत गाउँन थालेको आयुषका बुवा रामकृष्ण केसीले देशसञ्चारलाई बताए । उनले संगीत सिक्न थालेको ५ वर्ष भयो । आयुषलाई मोर्डन स्कूल दधिकोटमा क्षितिज कुलुङ र सुरशाला म्यूजिक एकेडेमीमा गायक, संगीतकर्मी अमृत क्षेत्रीले संगीत सिकाएका हुन् ।

आयुष घरका कान्छा छोरा हुन् । उनकी जेठी दिदी प्लस टु पछि नृत्य सिकाउँछिन्, अनि कान्छी दिदी कक्षा १० मा पढ्दैछिन् । आयुषको पुर्खौली घर सिन्धुपाल्चोक हो । अहिले उनी भक्तपुरको मोर्डन स्कूलमा कक्षा ७ मा पढ्दैछन् । बाबा टुुर गाइड हुन् भने आमा गृहणी । मध्यम किसिमको उनको परिवारमा आयुषको संगीतप्रतिको मोहलाई पूरा गर्न परिवारले सक्ने सहयोग गर्‍यो । जुनियर आइडल भएपछि उनले गीत पनि रेकर्ड गराईसकेका छन् ।

प्रितम आचार्य
इटहरी बस्ने ११ वर्षका प्रितम आचार्य पनि लिटिल च्याम्प्सको टप ३० मा पुगिसकेका छन् । उनी सन् २०१६ मा भएको सुरशाला जुनियर आइडलको उपविजेता हुन् । इटहरीको विश्व आदर्शमा कक्षा ६ मा पढ्दै गरेका आचार्य पाँच वर्षको हुँदादेखि संगीत सिक्न थालेका हुन् । उनको सानैबाट संगीतमा लगाम बसेको देखेर परिवारले उनलाई गायक नै बनाउने सोचेको प्रितमका बुबा काँशिनाथ आचार्यले बताए । उनका धेरै गुरुहरु छन् । बलराम समाल, प्रिन्सिपल भूपेन्द्र राई, राजु केसी, भोला राई लगायत सुरशाला म्यूजिक एकेडेमीका अमृत क्षेत्री । उनले सानैबाट साइरामको भजन गाएका थिए । उनी पूर्वाञ्चल आइडलमा सहभागी भएका थिए ।

प्रितम कान्छो छोरा हुन् । उनकी दिदी प्रिया कक्षा १० मा पढ्दैछिन् । प्रतमका बाबु सिप्रतिक ट्रेलिङमा सिनियर टेक्निसियनको काम गर्छन् भने आमा गृहणी हुन् । परिवारले उनको गायकीलाई सधैँ साथ दिएको छ । संगीत सिक्न उसलाई चाँहिने सबै सामग्रीको जोहो परिवारले गरेको छ । अहिलेसम्म प्रितमले धेरै वटा गीत रेकर्ड गराइसकेका छन् । यो यात्रामा उनीहरु एकैपटक पुगेका होइनन् । सारेगमपले पहिलो चरणमा भिडियोबाट अडिसन लिएको थियो ।

सुरशाला म्यूजिक एकेडेमीका कार्यकारी अध्यक्ष तथा गायक अमृत क्षेत्रीका अनुसार ३ वटा भिडियो पठाइसकेपछि उनीहरुलाई सिधै ‘लेभल टू’ को लागि दिल्ली बोलाइएको थियो । दिल्लीमा अडिसन दिन प्रितम र आयुषसँगै अरु ८ जना नेपाली बालबालिका पनि गएका थिए । ‘लेभल टु’मा सेलेक्ट भएका आयुष र प्रितम स्टुडियो राउण्डको लागि मुम्बई गए । त्यसपछि ‘कलिङ्ग राउण्ड’ अनि ‘मेगा अडिसन’मा छानिएर टप ३० मा पुगेका हुन् ।