शैक्षिक प्रमाणपत्र नक्कली भनिएका वीपी प्रतिष्ठानका कम्युटर इन्जिनियरलाई १५ दिन भित्र सम्पर्कमा आउन सुचना

धरान । वीपी कोइराला स्वास्थ्य विज्ञान प्रतिष्ठानका कम्युटर इन्जिनियर राकेश दास फरार भएका छन् । नक्कली शैक्षिक प्रमाणपत्र पेश गरी जागिर खाएको भन्दै अख्तियार दुरुपयोग अनुसन्धान आयोग र वीपी प्रतिष्ठानले समेत छानविन गरेपछि इन्जिनियर दास फरार भएका हुन् ।

प्रतिष्ठानका एक पदाधिकारीले कम्युटर इन्जिनियर राकेश दास लामो समयदेखि सम्पर्क नआएकोले १५ दिने सार्वजनिक सुचना जारी गरेको बताए । ‘उहाँको शैक्षिक योग्यताका सन्दर्भमा अख्तियार दुरुपयोग अनुसन्धान आयोगले समेत हामीलाई पत्र पठाएको थियो । त्यसै विषयमा आवश्यक डकुमेन्ट सहित उपस्थित हुन भनेपनि उहाँ नआएपनि प्रतिष्ठानले ३ महिनाको लागि निलम्बन गरेको थियो । सोहि अनुसार उहाँलाई सम्पर्कमा आउन भनिएको हो ।’ ति पदाधिकारीले भने ।

प्रतिष्ठानले राष्ट्रिय पत्रिकामा सुचना नै जारी गरी १५ दिन भित्र सम्पर्कमा आउन भनेको छ । प्रतिष्ठानमा अनुसार आयोगमा इन्जिनियर राकेश दासको शैक्षिक प्रमाणपत्र नक्कली रहेको भन्दै उजुरी परेपछि प्रतिष्ठानले नै सक्कली शैक्षिक प्रमाणपत्र लिएर उपस्थित हुन भनेको थियो । प्रतिष्ठानले पटकपटक शैक्षिक प्रमाणपत्रको सक्कल लिएर उपस्थित हुन भनेपनि राकेश दासले आफुले पोल्याण्डमा रोजगारीका लागि आफ्ना शैक्षिक प्रमाणपत्र सक्कलै पेश गरेकोले ल्याउन नसकेको जवाफ दिएका थिए ।

प्रतिष्ठानमा कार्यरत रहँदै प्रतिष्ठानलाई थाहै नदिइ दासले अन्यत्र जागिरका लागि अप्लाइ गरेको थाहा पाएपछि प्रतिष्ठानले शैक्षिक योग्यताको प्रमाणपत्र पेश नगरेको भन्दै गत बैशाख १७ गते ३ महिनाको लागि निलम्बन गरेको थियो । त्यसपछि पनि बैशाख १९ गते र २४ गते राकेश दासका नाममा पत्र पठाउँदै शैक्षिक प्रमाणपत्र पेश गर्न अनुरोध गर्दा समेत सम्पर्कमा नआएपछि सम्पर्कमा आउन सार्वजनिक सुचना नै जारी गरिएको ति पदाधिकारीले बताए ।

‘आयोगले नै पटकपटक हामीलाई शैक्षिक प्रमाणपत्र पेश गर्न भनेपछि हामीले उहाँले प्रतिष्ठानमा पेश गरेका शैक्षिक प्रमाणपत्रका प्रतिलिपी नै प्रमाणित नगरी पठाइएको भन्दै खुलाएर पठाइदिएका छौं, अब १५ दिन भित्र पनि सम्पर्कमा आउनुभएन भने प्रतिष्ठानको नियमानुसार कारवाही हुन्छ ।’ ति अधिकारीले नाम उल्लेख नगर्ने शर्तमा भने ।

प्रतिष्ठान स्रोतका अनुसार राकेश दासको नियुक्तिमा समेत आशंका रहेको छ । तत्कालिन प्रतिष्ठानका उपकुलपति डा. वीपी दासको पालामा प्रतिष्ठानको कम्युटर इन्जिनियर शाखाको प्रमुख भएका राकेश दासको नियुक्ति नै गैरकानुनी हुन सक्ने देखिएको छ । राकेश दास पूर्वउपकुलपति डा. दासका भतिज हुन् । यस विषयमा इन्जिनियर राकेश दाससँग उनको मोवाइलमा सम्पर्क गर्न खोज्दा सम्पर्क हुन सकेन ।