लिभरपुलले जित्यो च्याम्पियन्स लिगको उपाधि

काठमाडौं, १९ जेठ । टोटनह्याम हट्सपरलाई हराउँदै लिभरपुलले यो वर्षको युएफा च्याम्पियन्स लिग फुटबलको उपाधि जितेको छ । गएराति स्पेनको मड्रिडमा भएको फाइनलमा लिभरपुल २–० ले विजयी भयो । लिभरपुलका लागि मोहमद सलाह र डिभोक ओरिगीले एक–एक गोल गरे ।

खेलको पहिलो मिनेटमै सलाहको पेनाल्टी गोलमा लिभरपुलले अग्रता बनाएको थियो । ८७ औं मिनेटमा ओरीगीले एक गोल थप्दै लिभरपुलको जित पक्का गरे ।

गएरातिको जितसँगै लिभरपुल छैटौं पटक च्याम्पियन्स लिगको उपाधि जित्न सफल भएको छ । साथै उसले अघिल्लो सिजनको फाइनलमा रियाल मड्रिडसँग भोगेको हारको पीडा पनि भुलाएको छ । उता पहिलो पटक फाइनलमा पुगेको टोटनह्यामका लागि भने गएरातिको खेल अनुभवमा मात्रै सिमित बन्यो । एजेन्सीको सहयोगमा