रबिन्द्र यादव/नवलपरासी पश्चिम पाँचौं अन्तर्राष्ट्रिय योग दिवस नवलपरासी पश्चिममा पनि विभिन्न कार्यक्रम गरी मनाइँयो ।

हरेक बर्षको २१ जुनमा विश्वभर योग दिवस मनाउने गरिएको छ । दिवसको अवसरमा शुक्रबार बिहान अन्तर्राष्ट्रिय योग दिवस प्रतापपुर गाउँपालिका अायुर्वेद शाखा गुठी परसौनीले योग शिविर आयोजना गरेको छ । उक्त शिविरमा ५ सय जनाको उपस्थित रहेको थियोे ।

दिवसको अवसरमा जन जागृति मावि को चौरमा औपचारिक समारोह पनि आयोजना गरिएको छ । सो समारोहमा गाउँपालिका अध्यक्ष राजकुमार शर्माको समेत सहभागीता रहेको थियोे ।

छिमेकी राष्ट्रिय भारतका प्रधानमन्त्री नरेन्द्र मोदीको पहलमा संयुक्त राष्ट्रसंघले सन् २०१५ देखि जुन २१ लाई अन्तर्राष्ट्रिय योग दिवसका रुपमा मनाउन शुरु गरेको हो ।

अन्तर्राष्ट्रिय योग दिवस मनाउने व्यवस्थाका लागि सन् २०१४ मा संयुक्त राष्ट्रसंघको महासभामा भारतीय प्रधानमन्त्री मोदीले प्रस्ताव गरेका थिए ।

त्यो प्रस्तावलाई नेपालका तत्कालीन प्रधानमन्त्री स्व: सुशील कोइरालाले सहयोग र समर्थन गरेका थिए । संयुक्त राष्ट्रसंघले योगलाई शताब्दी विकासको सूचकांकका रुपमा समेत राखेको छ ।

योगलाई शारीरिक रुपमा स्वस्थ, मानसिक रुपमा शान्त र आधात्मिक चेतनाका साथ जिउन शैली सिकाउने कलाको रुपमा चिनिन्छ ।

योगले मानिसको जीवनशैली अनुशासित बनाउनुका साथै शारीरिक र मानसिक रुपमा चुस्त दुरुस्त राख्न मद्दत गर्ने प्रतापपुर गाउँपालिका अायुर्वेद शाखाका प्रमुख दिनबन्धु मिश्र बताउँछन् ।