सिंगापुरबाट प्रधानमन्त्री र मन्त्रीबिच दोस्रो पटक भिडिओ कन्फरेन्स

भदौ १७, काठमाडौँ | सिंगापुरमा उपचार गराइराखेका प्रधानमन्त्री केपी शर्मा ओलीले दोस्रो पटक मन्त्रीहरूसँग भिडिओ कन्फरेन्सबाट कुराकानी गरेका छन् । प्रधानमन्त्रीका प्रमुख राजनीतिक सल्लाहकार विष्णु रिमालका अनुसार प्रधानमन्त्रीले मंगलबार दिउँसो १:१० बजेदेखि मन्त्रीहरूसँग कुराकानी गरेका हुन् |

रिमालले प्रधानमन्त्री ओली र मन्त्रीहरूबीच भइराखेको कुराकानीको फोटो ट्वीट गर्दै लेखेका छन्, ‘सम्माननीय प्रम केपी शर्मा ओलीले सिंगापुरबाट टेलिप्रिजेन्स प्रविधिमार्फत् आज दोस्रो चोटी आफ्नो क्याविनेटका सदस्यहरूसँग सरकारका कामको बारेमा छलफल गर्नु भयो। उहॉले आफ्नो उपचारबारे जानकारी दिनुहुने र मन्त्रीज्यूहरूले आफ्नो कामकाबारे प्रमलाई अपडेट गर्नुहुने योजना रहेको छ।’

विदेशमा बसेर नेपालको मन्त्रिपरिषद् बैठक चलाउन नमिल्ने भन्दै आलोचना भएको थियो | सत्तारूढ र प्रतिपक्षी नेताले संसददेखि सामाजिक सञ्जालमा विरोध जनाएका थिए। सरकारका प्रवक्ता सञ्चार तथा सूचना प्रविधि मन्त्री गोकुल बाँस्कोटाले पछि संसदमा प्रधानमन्त्रीसँग भएको उक्त भिडिओ कन्फरेन्स क्याबिनेट बैठक नभएको जिकिर गरेका थिए | यसपालि प्रधानमन्त्रीका राजनीतिक सल्लाहकार रिमालले भिडिओ कन्फरेन्स छलफलमात्र भएको बताएका छन् |