‘प्रधानमन्त्रीलाई विश्राम गर्न दिनुस्’

भदौ १८, काठमाडौँ | बुधबार प्रतिनिधिसभा बैठकमा बोल्दै प्रमुख प्रतिपक्षी दल नेपाली कांग्रेसका सांसद गगन थापाले प्रधानमन्त्री केपी शर्मा ओलीलाई विश्राम गर्न दिन सत्तारूढ नेपाल कम्युनिष्ट पार्टी (नेकपा) लाई आग्रह गरेका छन् |

उनले  प्रधानमन्त्रीको स्वास्थ्य अवस्थाबारे संसदमा जानकारी  नगराइएको प्रति आपति जनाएका छन् | सत्तारूढ नेकपामा प्रधानमन्त्री हुन इच्छा राख्ने र पहिला पनि प्रधानमन्त्री भइसकेका नेताहरू भएको उल्लेख गर्दै उनले बिरामी भएका प्रधानमन्त्रीलाई पार्टीले विश्राम दिनुपर्ने बताएका छन् । ‘प्रधानमन्त्रीलाई विश्राम गर्न दिनुस्,’ उनले भने, ‘कार्यकारी प्रमुख एकैपटक लामो समय बाहिर बस्दा राष्ट्रिय सुरक्षा कूटनीतिक मर्यादा जोखिमको प्रश्न छँदैछ। भिडिओबाट मन्त्रीसँग कुरा गरेर शासकीय जिम्मेवारी पूरा हुन सक्दैन।’

प्रधानमन्त्री ओली अहिले उपचारका लागि सिंगापुरमा छन्। १२ वर्षअघि  मिर्गौला प्रत्यारोपण गरेका ओलीमा अहिले मिर्गौलासम्बन्धी एन्टिबडी बढी भएको छ | गत साउनमा उनी पहिलो पटक उपचारका लागि सिंगापुर गएका थिए। पहिला  थाइल्याण्डको बैंककमा नियमित फ्लोअप गराइरहेका प्रधानमन्त्रीले सिंगापुरमा औषधी परिवर्तन गरेका थिए।

उक्त औषधीको असरले बिरामी हुन थालेपछि उनी फेरि भदौ ५ गते  सिंगापुर गएका हुन्। प्रधानमन्त्री लामो समय विदेश भएकाले उनले भिडिओ कन्फ्ररेन्सबाट मन्त्रीहरूसँग छलफल गर्ने गरेका छन् । प्रधानमन्त्री शुक्रबार स्वदेश फर्किने कार्यक्रम छ। उनलाई भेट्न नेकपा महासचिव बिष्णु पौडेल मंगलबार सिंगापुर गएका छन्। ओलीले सचिवालय सदस्य वामदेव गौतमलाई पनि सिंगापुर बोलाएका छन्। गौतम बुधबार सिंगापुर गएका छन् ।