काठमाडौं, । निवर्तमान सभामुख कृष्ण बहादुर महराबाट आफू बलात्कृत भएको भनेर आरोप लगाउने रोशनी शाहीले आरोप लगाएको भोलिपल्टै आज आफ्नो बोली फेरेकी छिन् । उनले महरा आफ्नो बुवासरहको मानिस भएको बताउँदै रिसको झोंकमा आफूले हिजो (सोमबार) लगाएका सबै आरोप गलत भएको बताएकी छिन् ।
नागरिकखबर डटकमलाई दिएको एक अन्तर्वार्तामा उनले भनेकी छिन्,‘उहाँ (महरा) मेरो बाउ समानको मान्छे हो । उहाँमाथि लागेको आरोपमा कुनै सत्यता छैन । मैले रिस उठेको बेलामा के के भने यी सब निराधार हुन् । त्यसमा कोही पनि भ्रममा नपर्नु होला, मैले रिस उठ्दा भनेका के के कुरालाई पत्रकारले बंगाएर लेखिदिएछन् ।’
उनले महराले कर्मचारी समायोजनमा चाहेको ठाउँमा नभएको नआत्तिन भनेर फोन गरेको पनि उक्त अन्तर्वार्तामा प्रष्ट पारेकी छिन् । उनले थपे भनेकीछिन्,‘पछिल्लो समय मलाई कर्मचारी समायोजनमा नमिलेपछि बेस्सरी रिस उठिरहेको थियो । त्यसै झोंकमा मैले के के भने ती सबै गलत हुन्। तर, उनले आफूलाई महराले फोन गरेको भने स्विकार गरेकी छिन् । शाहीले आफूले विगत आठवर्षदेखि डिप्रेसनको औषधि सेवन गरिरहेको पनि उक्त ईन्टरभ्यूमा बताएकी छिन् । उनले भनेकी छिन्,‘म आठ वर्षदेखि डिप्रेसनमा छु । आमाको निधनपछि डिप्रेसनमा छु । नियमति औषधि सेवन गरिरहेको छु ।’
