काठमाडौं । एभरेस्ट प्रिमियर लिग ईपीएलको चौथौं संस्करणमा चर्चित खेलाडी ड्यान स्मिथ, केसरिक विलियमस, महमद सहजाद, सुकुङ्गे प्रसन्ना, उपुल थरङ्गा र लिम प्लङकिट आउने भएका छन् । भने, युवराज सिहं र क्रिस गेललाई ल्याउने तयारी भएको छ । कीर्तिपुरस्थित त्रिवि क्रिकेट मैदानमा आगामी चैत १ गतेबाट सुरु हुने लिगका लागि उनीहरूलाई ल्याउन खोजिएको हो । विश्व क्रिकेटमा नाम चलेका ठूला खेलाडीलाई लिगमा भित्र्याउन आयोजकले सहभागी हुने फेन्चाइज टोलीसँग छलफल अगाडि बढाएको छ ।
युवराज सिंह टि–२० अन्तर्राष्ट्रियमा एकै ओभरमा ६ छक्का प्रहार गर्ने एक मात्र खेलाडी हुन् भने क्रिस गेल टि–२० क्रिकेटमा विस्फोटक व्याटसम्यानका रूपमा चिनिन्छन् । युवराजले भारतबाट ५८ टि–२० अन्तर्राष्ट्रिय, ३०४ एकदिवसीय र ४० टेस्टम्याच खेली सकेका छन् । क्रिस गेलले वेस्ट इन्डिजबाट ५८ टि–२० अन्तर्राष्ट्रिय, ३०१ एकदिवसीय र १०३ टेस्टम्याच खेलिसकेका छन् । उनी युनिर्भसल बोसका नामले परिचित छन् ।
यसअघि दक्षिण अफ्रिकाका पूर्व कप्तान हसिम अमला आउने पक्का भइसकेको छ । उनलाई सहभागी हुने एक टोलीले लिनेछन् । ईपीएलमा ६ टोली सहभागी हुँदै आएका छन् । जसमा काठमाडौं गोल्डेन्स, ललितपुर प्याट्रिओट्स, पोखरा राइनोज, चितवनटाइगर्स, विराटनगर वारियर्स र भैरहवा ग्यालियर्टस छन् । आयोजक अहिले सहभागी टोलीलाई खेलाडी रिटेन र रिलेजका लागि समय दिएको छ ।
राष्ट्रिय टोलीबाट खेलेका र खेलिरहेका पूर्वकप्तान पारस खड्का, कप्तान ज्ञानेन्द्र मल्ल, कुसल भुर्तेल, सुबास खकुरेल, दिपेन्द्रसिहं ऐरी, पवन सरार्फ, विनोद भण्डारी, वसन्त रेग्मी, करण केसी, प्रदीप ऐरी, शरद भेषवाकर, सुसन भारी, आरिफ शेख, अभिनास बोहरा, सन्दीप लामिछाने, सोमपाल कामी, रोहितकुमार पौडेल र ललितनारायण राजवंशीलाई पहिलो श्रेणीमा राखेको छ । खेलाडीलाई विभिन्न टोलीले आफ्नोमा राख्ने वा हटाउने लगायतका निर्णयका लागि आयोजकले बिहीबारसम्मको समय दिएको छ ।
आयोजकले यस वर्षबाट अन्य घरेलु लिग खेलेका विदेशी खेलाडीलाई सहभागी नगराउने निर्णय गरेको छ । नेपाली क्रिकेटको विकास र उन्नतिका लागि २०७३ सालबाट सुरु गरीएको एभरेस्ट प्रिमियर लिग क्रिकेट लिगले छोटो समयमै उचाइ लिएको छ । फेन्चाइज लिगमा अहिलेसम्मकै सर्वाधिक दर्शक र विदेशी खेलाडीलाई भित्र्याउन सफल यस लिग ईपीएल प्राइभेट लिमिटेडले आयोजना गर्दै आएको छ । हरेक वर्षको अन्तिम समयमा आयोजना हुने यस लिग टि–२० फम्यार्टमा हुन्छ ।
२०७३ सालम सीजी गुप्रको मुख्य प्रायोजनमा सुरु यस लिगमा अहिले विभिन्न ६ व्यावसायिक घराना जोडिएका छन् । विदेशी लिगको स्टाइलमा सञ्चालन हुँदै आएको यस लिगमा चियर लेडीसँगै मनोरञ्जनात्मक गतिविधि सञ्चालन हुँदै आएका छन् । विशेषतः काठमाडौंमा सञ्चालन हुने भएका कारण ईपीएलप्रति समर्थकको क्रेज बढ्दो छ । अन्य फेन्चाइज लिग काठमाडौं बाहिर सञ्चालन हुँदै आएका छन् । ईपीएल भने कीर्तिपुरस्थित त्रिवि क्रिकेट मैदानमा सञ्चालन हुँदै आएको छ ।
तेस्रो संस्करणसम्म आइपुग्दा पन्चकन्या तेज, ललितपुर प्याट्रियट्स र विराटनगर वारियर्सले एक–एक पटक उपाधि जितेका छन् । गतवर्ष ईपीएलमा दक्षिण अफ्रिकाका रिर्चड लेभीसहित इङल्यान्डका जोन सिम्ससोन, आयरल्यान्डका पाउल रोबेर्टो स्ट्रलिङ, नेदरल्यान्डका रायन टेन्डोस काटे आएका थिए ।
