असई र हवलदारले कुटे विद्युत प्राधिकरणका कर्मचारी

काठमाडौं । नेपाल विद्युत प्राधिकरण जोरपाटी वितरण केन्द्रबाट खटिएको ‘नोलाइट’ टोलीलाई प्रहरीले कुटपिट गरेको छ । मङ्गलबार राति १० बजे बिजुलीको लाइन मर्मत गरि फर्किएका दुई जना कर्मचारीमाथि सशस्त्र प्रहरीका प्रहरी सहायक निरीक्षक प्रविण राई र हवलदार छविन्द्र राईले कुटपिट गरेका हुन् ।

कुटपिटबाट घाइते भएका विद्युत प्राधिकरणका कर्मचारी सूर्यबहादुर खत्री र सुवास खड्काको अर्थोपेडिक हस्पिटलमा उपचार भैरहेको छ । कुटपिट गर्ने दुई जनालाई बौद्ध चौकीमा राखिएको छ ।

महानगरीय प्रहरी बौद्धका अनुसार प्राधिकरणका कर्मचारीले तीव्र गतीमा गाडी चलाएको र त्यसै विषयमा विवाद भएको थियो । प्रहरीविरुद्ध जाहेरी आएपछि मुद्दा चलाइने र दोषीमाथि कारबाही प्रक्रिया अघि बढाइने बौद्ध प्रहरीले जनाएको छ ।