मनोज पराजुली ।असार ५, काठमाडौं । सरकारले वैदेशिक रोजगारी खुला गर्ने निर्णय गरेको छ । कोभिड–१९ संकट व्यवस्थापन केन्द्रको शुक्रबार बसेको बैठकले विदेशबाट विदामा आएका र करार अवधि बाँकि रहेकाहरुको लागि विदेशमा रोजगारीको लागि जान दिने निर्णय गरिएको परराष्ट्रमन्त्री प्रदीप ज्ञवालीले साझा सवाललाई बताए ।
शुक्रबार श्रम रोजगार तथा सामाजिक सुरक्षा मन्त्री रामेश्वर राय यादवले बिदामा आएर विदेश जान नपाएकाहरुको लागि जान दिने निर्णय गरिदिन कोभिड–१९ संकट व्यवस्थापन केन्द्रमा सिफारिस गरेका थिए । सोहि सिफारिसका आधारमा श्रम स्वीकृतिको नयाँ निर्णय नगरिएको तर बिदामा आएर श्रम करार अवधि बाँकी भएकाहरुको लागि उडान अवरोध मात्र हटाइएको मन्त्री ज्ञवालीले जानकारी दिए ।
जो बिदामा आएका छन् उनीहरुको लागि मात्र हो उनले भने ‘जुनसुकै देशबाट नेपाल आएर विदेश जान नपाएकाहरू अब जान पाउनेछन् ।’ विदेशबाट नेपाली ल्याउन चार्टर गरिएको जहाज मार्फत जान सक्ने उनले बताए । सरकारले गत फागुन २९ गतेबाट श्रम स्वीकृति रोक्ने निर्णय गरेसंगै वैदेशिक रोजगारीको बाटो ठप्प रहेको छ ।
