प्रधानमन्त्री ओलीको प्रश्न- बेसारकै नाममा राजीनामा दिने ?

काठमाडौं, १० असार । नेपाल कम्युनिस्ट पार्टीका अध्यक्ष समेत रहेका प्रधानमन्त्री केपी शर्मा ओलीले कसैले विरोध गर्दैमा राजीनामा नदिने बताएका छन् । उनले आरोपहरुको सामना गरेर बढ्ने भन्दै कसैले विरोध गर्दैमा राजीनामा दिइहाल्नुनपर्ने बताएका हुन् ।

आज बसेको स्थायी कमिटि बैठकमा सहभागी एक नेताका अनुसार सरकारलाई कमजोर बनाउने प्रयास भइरहेको बताउँदै ओलीले प्रतिवादको भाषा बोलेका थिए । उनले पार्टीभित्रैबाट सरकारलाई असहयोग भइरहेको समेत बताए । उनले गरेको प्रश्न उदृत गर्दै बैठकमा सहभागी नेताले भने, ‘मान्छेहरु बेसारका नाममा सडकमा निस्किएका छन्, अब के बेसारकै नाममा राजनिामा दिने ?’ अर्का अध्यक्ष प्रचण्डले हिजो बालुवाटारमा राजीनामा मागेको र आज पनि कडा आलोचना गरेपछि ओलीले त्यस्तो जवाफ दिएका हुन् ।

विना तथ्य अनेकन आरोपहरु लगाइएको भन्दै उनले सरकारका मन्त्रीहरुको बचाऊ गरे । गल्ती गर्नेलाई आफूले कुनै हालतमा नछाड्ने समेत प्रष्ट पारे ।

सरकारमाथि पार्टीबाहिरबाट आक्रमण भइरहँदा पार्टी प्रतिरक्षामा लाग्नुपर्नेमा त्यसो नभएको भन्दै ओलीले असन्तुष्टि जनाए ।-File Photo