मिडियालाई नैतिक दायराभित्र बस्न सरकारको चेतावनी, दुतावासमार्फत भारतलाई ‘प्रोटेस्ट नोट’

असार २८, काठमाण्डौ । सरकारका प्रवक्ता एवंसञ्चार तथा सूचना प्रविधिमन्त्री डा युवराज खतिवडाले स्वदेशी र विदेशी सञ्चारमाध्यम नैतिक दायराभित्र बस्नुपर्ने बताएका छन् ।

आइतबार सिंहदरबारमा नेपाल मिडिया सोसाइटी, ब्रोडकास्टिङ एसोसिएसन अफ नेपाल (बान) लगाएतले बुझाएको ज्ञापन पत्र बुझ्दै उनले अपमानित ढंगबाट कुनै पनि मिडिया जान नहुनेमा जोड दिए । कुनै दुर्भाव फैलाउने गरी, चरित्र हत्या गर्ने गरी मानमर्यादालाई नै आँच पु¥याउने गरी प्रतिष्ठा घटाउने गरी गरिएका सञ्चार माध्यमका समाचार, विश्लेषणहरुको भत्सर्ना गरेको उनको भनाई थियो ।

राष्ट्र तथा राष्ट्रियता सार्वभौमिकता र नेपालीका स्वाभिमानमा आँच पु¥याउने समाचारहरू सम्प्रेषण नगर्न पनि उनले अनुरोध गरे । मन्त्री खतिवडाले भारतीय सञ्चारमाध्यमले दूरासयपूर्ण विषयवस्तु बाहिर ल्याएको सञ्चारमाध्यम नै बन्द गरिएको बताएका छन् ।

यसैबीच भारतीय सञ्चार माध्यममा नेपाल र नेपाली नेतृत्वबारे झुटा र उच्छृङ्खल समाचार प्रसारण भएकोमा नेपालले ‘प्रोटेस्ट नोट’ पठाएको छ । परराष्ट्र मन्त्रालयले दिल्लीस्थित नेपाली दूतावासमार्फत पठाएको ध्यानाकर्षण पत्रमा नेपालबारे प्रसारित अश्लील सामाग्रीमाथि कदम चाल्न र आगामी दिनमा यस्ता सामाग्रीले स्थान नपाउने सुनिश्चित गर्न माग गरिएको छ ।