साउन ३, काठमाण्डौ । दिउँसो ३ बजेदेखी साँझ ७ः३० बजेसम्म बसेको सत्तारुढ दल नेपाल कम्युनिस्ट पार्टी (नेकपा) को सचिवालयको बैठकले कुनै निष्कर्ष निकाल्न नसकेको प्रवक्ता नारायणकाजी श्रेष्ठले बताएका थिए । तर सचिवालयमा मंसिरमा महाधिवेशन गर्ने सहमति भएको स्रोतले बताएको छ । अहिलेलाई नेतृत्वमा फेरबदल नगर्ने, प्रधानमन्त्री केपी ओलीले पनि राजीनामा नदिने तर मंसिरमा महाधिवेशन गरेर नयाँ तरिकाले अघि बढ्ने विषयमा लगभग सहमति भएको बुझिएको छ ।
महाधिवेशनअघि पुष्पकमल दाहाल कार्यकारी अध्यक्ष नै रहने, केपी ओली प्रधानमन्त्री र अध्यक्ष दुवै पदमा रहने सहमति भएको नेकपाका एक नेताले जानकारी दिएका हुन् । तर केही मन्त्री र मुख्यमन्त्री फेरबदल गरेर भागबण्डा मिलाउने तयारी भइरहेको पनि ति नेताले बताए ।
आजको सचिवालय बैठकमा स्वास्थ्य तथा जनसंख्या मन्त्री भानुभक्त ढकाल, महिला तथा समाजकल्याण मन्त्री पार्वत गुरुङ र प्रदेश पाँचका मूख्यमन्त्री शंकर पोखरेललाई पनि सहभागि गराइएको थियो । तिनै जनाको ठाउँमा अरु कसैलाई ल्याउने विषयमा छलफल गर्न उनीहरुलाई पनि सहभागि गराइएको बुझिएको छ ।
बैठकमा प्रधानमन्त्री ओलीले अर्का अध्यक्ष पुष्पकमल दाहाल र वरिष्ठ नेता माधवकुमार नेपाल पक्षलाई आफूले प्रधानमन्त्री पदबाट राजीनामा दिएपछि को प्रधानमन्त्री बन्छ त भनेर प्रश्न गरेको पनि बताइएको छ । ओलीले प्रश्न गरेपछि कसैले पनि जवाफ दिन सकेका थिएनन् । यद्यपी यस विषयमा बैठकपछि प्रवक्ता श्रेष्ठलाई प्रश्न गर्दा होइन भनेका थिए ।
यसैबीच सचिवालय बैठक सकिनेवित्तिकै प्रधानमन्त्री केपी शर्मा ओली र अध्यक्ष दाहाल राष्ट्रपतिलाई भेट्न शीतलनिवासतर्फ लागेका छन् ।
