ओली दोस्रो पटक एमाले अध्यक्षमा विजयी

मंसिर १४, दिपक गौतम, काठमान्डौं : नेकपा एमालेको अध्यक्षमा केपी शर्मा ओली दोस्रो पटक विजयी भएका छन् । चितवनमा आयोजित १० औं राष्ट्रिय महाधिवेशनबाट ओली पुनः चार वर्षे कार्यकालका लागि अध्यक्षमा निर्वाचित भएका हुन् । आज बिहान भएको मतदानको मत परिणाम अनुसार ओलीले उनका प्रतिद्वन्द्वी भीम रावललाई हराउँदै निर्वाचित बनेका हुन् ।

ओलीले १८०८ मत पाएर अध्यक्षमा चुनिएका छन् । अर्का प्रत्यासी भीम रावलले २२३ मत पाएका स्रोतले जनाएको छ । यद्यपि निर्वाचन समितिले मत परिणामको औपचारिक घोषणा भने गरेको छैन ।

मंगलबार बिहान भएको निर्वाचनमा एमालेका २ हजार १ सय ५३ प्रतिनिधिहरुमध्ये २ हजार ९६ ले आफ्नो मत खसालेका थिए । सर्वसम्मत हुने ओलीको आंकाक्षामा भीम रावलले चुनौती खडा गरेपछि उनी महाधिवेशनमा मंगलबार भएको मतदानबाट बहुमतले विजयी भएका हुन् ।

ओलीले यसअघिको नवौं महाधिवेशनमा नेता माधवकुमार नेपाललाई ४६ मतले हराएर विजयी बनेका थिए ।