यी हुन् नेपालमा ओमिक्रोन पुष्टि भएका दुई व्यक्ति

काठमाडौं । नेपालमा पहिलो पटक कोभिड-१९ को नयाँ भेरियन्ट ओमिक्रोन पुष्टि हुनेमा दक्षिण अफ्रिकाबाट नेपाल आएका ६६ वर्षीय विदेशी नागरिक र उनको सम्पर्कमा आएका ७१ वर्षीय अर्का विदेशी व्यक्ति छन् । उनीहरू दुवैले कोरोनाविरुद्धको खोपको पूर्ण मात्रा लगाएका र पीसीआर रिपोर्ट पनि नेगेटिभसहित नेपाल प्रवेश गरेका मन्त्रालयले जनाएको छ ।

उनीहरु दुवैलाई आइसोलेसनमा राखिएको र अहिले अवस्था सामान्य रहेको मन्त्रालयले जनाएको छ । ६६ वर्षीय विदेशी नागरिक मंसिर ३ गते त्रिभुवन अन्तर्राष्ट्रिय विमानस्थल हुँदै नेपाल प्रवेश गरेका थिए । उनीसँग सम्पर्कमा आएका ७१ वर्षीय व्यक्तिं आफैंलाई मंसिर ७ गते कोभिड–१९ सँग मिल्दाजुल्दा लक्षणहरु देखिएपश्चात परीक्षण गराउन आएका थिए ।

उनीहरुको पीसीआर रिपोर्टमा एस जिन नेगेटिभ आएपछि राष्ट्रिय जनस्वास्थ्य प्रयोगशालामा थप परीक्षण गरिएको थियो । सो क्रममा दुवै जनामा मंसिर १९ गते (आइतबार) राति नयाँ भेरिएन्ट ओमिक्रोन पुष्टि भएको हो । मन्त्रालयले दुई व्यक्तिहरुसँग सम्पर्कमा आएकाहरुको बृहत कन्ट्याक्ट ट्रेसिङ गरिएको, कन्ट्याक्ट ट्रेसिङबाट प्राप्त ६६ जनाको पीसीआर परीक्षण गर्दा सबैको नतिजा नेगेटिभ आएको बताएको छ ।