एजेन्सी । सन् २०२१ दक्षिण भारतीय फिल्मका लागि उत्कृष्ट साबित भएको छ । दक्षिण भारतका कैयौं फिल्मले भारतीय दर्शकमात्र नभई विश्वकै दर्शकको ध्यान आफूतिर खिचिरहेको छ । ठूलो बजेटको दक्षिण भारतीय फिल्म ‘आरआरआर’को ग्राण्ड रिलिज अघि फिल्म ‘पुष्पाः द राइज’ले बक्सअफिसमा रिलिजको दुई दिनमै सय करोड बढीको व्यापार गरेको छ ।
व्यापार विश्लेषक रमेश बालाका अनुसार फिल्मले रिलिजको दुई दिनमा विश्वव्यापी रुपमा सय करोड बढी कारोबार गरेको छ । फिल्मले दुई दिनमा १ सय १६ करोड व्यापार गरेको छ । उसले पहिलो दिन ७१ करोड र दोस्रो दिन ४५ करोड गरी कुल १ सय १६ करोड व्यापार गरेको हो ।
अमेरिकाको बक्सअफिसमा फिल्मले १ दशमलब ३० मिलियन डलरको व्यापार गरेको छ । भारतीय रुपैंयाँमा यसलाई रुपान्तरण गर्दा करिब १० करोड रुपैंयाँ पर्दछ । अर्का विश्लेषक तरण आदर्शले हिन्दी बक्सअफिसको आँकडा सार्वजनिक गरेका छन् ।
उनका अनुसार फिल्मले पहिलो दिन ३ करोड र दोस्रो दिन ४ करोडको कमाई गरेको छ । यो हिसाबले फिल्मको हिन्दी भर्सनले दुई दिनमा सात करोडको कमाई गरेको छ । फिल्मले अष्ट्रेलियासहित अन्य देशमा सानदार कमाई गरिरहेको छ । फिल्ममा अल्लु अर्जुन र रश्मिका मन्दाना प्रमुख भूमिकामा छन् ।
