२७ जेठ २०७९, काठमाडौँ : बलिउडको ‘सिरियल किसर’ का रुपमा परिचित छन् अभिनेता इमरान हाशमी । सन् २००३ मा महेश भट्टको निर्माण रहेको फिल्म ‘फुटपाथ’ मार्फत बलिउडमा डेब्यु गरेका इमरानको छवि नै सिरियल किसरको बन्यो । उनको हरेक फिल्ममा गर्ने किसले चर्चा पाउन थाल्यो । उनले कन्फिडेन्सकिआ साथ गर्ने किसको चर्चा हुनु नौलो रहेन । यद्यपि उनले एक अन्तर्वार्ताको क्रममा किस गर्दा डराएको खुलासा समेत गरेका छन् । फिल्म ‘घनचक्कर’ को छायांकनको क्रममा अभिनेत्री विद्या बालनलाई चुम्बन गर्न आफू डराएको बताएका हुन् ।

इमरान र विद्याले फिल्म ‘घनचक्कर’ मा कैयौँ चुम्बन दृश्य दिएका छन् । विद्यालाई चुम्बन गर्दा इमरान निकै डराएका थिए । जबकि यसअघिको फिल्ममा उनी जति खुसीका साथ अभिनेत्रीलाई चुम्थे । ‘घनचक्कर’ मा माहौल ठीकविपरीत देखियो । एक च्याट शो मा उपस्थित भएकी विद्याका अनुसार इमरानले विद्यासँग चुम्बन दृश्य दिँदा डराउने कारण विद्याका पति तथा फिल्म निर्माता सिद्धार्थ रोय कपुर थिए ।

‘सिद्धार्थले के भन्लान् ? ’ चुम्बनपछि विद्यालाई इमरान यही प्रश्न सोधिरहन्थे । किनकि फिल्मका निर्माता विद्याका पति सिद्धार्थ नै थिए । ‘फिल्ममा हामी कलाकार हौं । कथा अनुसार हामीले अभिनय गर्नुपर्छ । तर इमरानले मलाई प्रश्न गरिरहँदा म अचम्ममा पर्थें’, उनले भनेकी छन् । इमरान पछिल्लो समय टाइगरको तेस्रो सिरिज र सेल्फी नामक फिल्ममा व्यस्त छन् ।