अन्तिम संस्कार गर्दै गर्दा बिचमै शव उठेको अनौठो घटना कहिल्यै सुन्नुभएको छ? आज हामी यहाँ यस्तै एउटा अनौठो घटना बारे चर्चा गर्दैछौँ ।
पेरुमा करिब एक महिनाअघि अन्तिम संस्कारका लागि लैजादैँ गरेको एक महिलाले आँखा खोलिन् । ३६ वर्षकी रोसा इसाबेला सेस्पेडेस कैलाका एक भयानक कार दुर्घटनाको शिकार भएपछि २५ अप्रिलमा डाक्टरद्वारा मृत घोषित गरिएकी थिइन् । दुर्घटनामा उनी टाउको टेकेर भुइँमा लडेकी थिइन् । जसकारण उनको दिमागमा गम्भीर चोट लागेको थियो ।
२६ अप्रिलको अन्तिम संस्कारमा उनलाई कफिनमा राखेर समाधिस्थल लगिँदै थियो । उनको परिवारका सदस्यले त्यति नै बेला उनले आफ्नो आँखा खोलेको देखे । उनलाई पसिना आइरहेको थियो । त्यसपछि, समाधिस्थलका प्रबन्धकले तुरुन्त प्रहरीलाई खबर गरे ।
डाक्टरले रोसा इसाबेलमा जीवनको लक्षण देखिएको बताए । महिलाका परिवारले यसको अनुसन्धानको माग गर्दै रोसा कोमामा गएको आंकलन गरे । यद्यपि, यसको धेरै कारण हुनसक्छ । मृत्युपछि परेलामा पनि थुप्रै हलचल देखिन्छ । मृत शरीरमा पनि विभिन्न परिवर्तन हुनसक्छ । जुुन विशेषगरी पीडादायी मृत्युपछि हुने गर्छ ।
सन् १९९८ मा गरिएको एक शोधमा करिब १७५ घटना भेटिएका थिए जहाँ ब्रेन डेड भएपछि एक हप्ताभन्दा बढी समयसम्म शरीरले काम गरिरहेको थियो ।
त्यस्तै, यस घटनाको कारण जे भए पनि अन्त्य सुखद रहेन । रिपोर्टका अनुसार रोसालाई स्थानीय अस्पतालमा भर्ना गरिएको थियो । जहाँ उनको ब्लड अक्सिजन लेभललाई मोनिटर गरिँदै थियो । तर केही घण्टाभित्रै उनलाई पुनः दोस्रो पटक मृत घोषित गरियो । जुन अन्तिम पटक थियो ।
