नेपालले विश्व बैंकबाट पौने १३ अर्ब ऋण लिँदै

काठमाडौं । विश्व बैंकले नेपाललाई एक सय मिलियन डलर अर्थात पौने १३ अर्ब रुपैयाँ ऋण दिने भएको छ ।

नेपालको हरित, जलवायु–उत्थानशील र समावेशी विकासमा सहयोग गर्ने उद्देश्यले विश्व बैंकको कार्यकारी निर्देशक बोर्डबाट ऋण स्वीकृत भएको हो । विश्व बैंकले ग्रीन, रेसिलियन्ट र इन्क्लुसिभ डेभलपमेन्ट (जीआरआईडी)का तीन चरणका कार्यक्रममध्ये पहिलो चरणका कार्यक्रम कार्यान्वयन गर्न उक्त ऋण सहायता उपयोग हुने जनाएको छ ।

बैंकका माल्दिभ्स, नेपाल र श्रीलंकाका लागि निर्देशक फारिस हदाद जेभोसले कोभिड-१९ महामारीपछि नेपालमा हरित र समावेशी विकासमा विश्व बैंकले सहायता केन्द्रित गरेको बताए । उनले यस सहायताले कृषि, वन, पानी, भूमीको प्रयोग, शहरी विकास, फोहोर व्यवस्थापन तथा प्रदूषण नियन्त्रणका क्षेत्रमा सरकारको मुख्य नीतिगत कार्य गरिने जनाए ।

साथै, विश्व बैंकले यी कार्यक्रममार्फत कोभिड, प्रकोप, जलवायु र वातावरणीय जोखिमलगायत नेपालको विकासलाई असर गर्ने जटिल चुनौतीको सामना गर्दै गरिबी निवारणमा सहयोग पुग्ने जनाएको छ ।