गभर्नर अधिकारीविरुद्ध माइतीघरमा नेविसंघको धर्ना

काठमाडौं । शुक्रबार बिहान नेपाल विद्यार्थी संघले नेपाल राष्ट्र बैंकका गभर्नर महाप्रसाद अधिकारीको बर्खास्तीको माग गर्दै माइतीघर मण्डलामा प्रदर्शन गरेको छ ।

गभर्नर अधिकारी प्रमुख प्रतिपक्ष दल एमालेको अर्थ तथा योजना विभागको सदस्य रहेको चर्चा सुरु भएपछि उनको सबैतिर आलोचना भइरहेको छ । नेविसंघले यहीबीच आन्दोलन गर्दै उनको राजीनामा माग गरेको छ ।

नेविसंघका नेता मदन उपाध्यायले राष्ट्र बैंकका गभर्नर जस्तो व्यक्ति कुनै पार्टीको कार्यकर्ता हुनु राष्ट्रकै लज्जाको विषय भएको बताए । ‘नेपालको अर्थतन्त्रलाई रेगुलेसन गर्ने संस्थाको प्रमुख पार्टीको झोले भएर हिँड्नु निन्दाजनक हुन्छ,’ उनले भने ।

यसैगरी, उपाध्यायले गभर्नरको राजीनामा नआए आन्दोलनलाई थप सशक्त बनाइने चेतावनी दिए । आन्दोलनमा नेविसंघ एनसीसी कलेजका नेता अन्सुल केसी, त्रिविका नेता विष्णु बडैला, श्याम पाण्डे, राज ठकुराठी, टिकेष भट्ट, सदीक्षा आचार्य लगायत नेताहरू छन् । धर्ना एक घन्टा लामो हुने जनाइएको छ ।