माओवादीको संसद् बहिष्कारपछि आज सर्वदलीय बैठक बस्दै

काठमाडौं । नेकपा माओवादीले कर्णाली प्रदेशमा मंगलबार संसद् बहिष्कार गरेको विषयलाई लिएर आज सर्वदलीय बैठक बस्ने जनाइएको छ ।

सभामुख राजबहादुर शाहीले रातोपाटीलाई सर्वदलीय बैठक आज दिउँसो १ बजे बोलाइएको जानकारी दिए । उनका अनुसार सत्तारूढ दलले संसद् बहिस्कार गरेपछि समाधानका लागि सर्वदलीय बैठक बस्ने भएको हो ।

त्यस्तै, माओवादीका सांसदहरूले भने मुख्यमन्त्री जीवनबहादुर शाही आफ्नो दलले उठाएको विषयमा गम्भीरता नदेखाएको खण्डमा विकल्प सोच्न सकिने बताउँछन् । तर पूर्वमन्त्री एवम् माओवादी सांसद नरेश भण्डारी तत्कालै राजीनामा माग गर्ने कुरा नसोचिएको बताउँछन् । ‘अझै पनि मुख्यमन्त्री गम्भीर नबने विकल्प सोच्न सकिन्छ’,उनले भने ।

यहीबीच, माओवादीले मुख्यमन्त्रीलाई गठबन्धनको मूल्य मान्यता विपरीत चलिरहेको आरोप लगाएको छ ।