महानगरले एक साता नउठेको फोहोर भोलिदेखि संकलन गर्ने

काठमाडौं।  काठमाडौं फोहोर पालिकाको फोहोर भोलिदेखि संकलन हुने भएको छ । महानगरले आज सूचना जारी गरी भोलिदेखि फोहोर संकलन हुने बताएको हो । सूचनामा भनिएको छ, ‘भोलि १२ गते बिहीबार बिहान ६ बजेदेखि तपाईंको पायक पर्ने स्थानमा फोहोरमैला ढुवानीका लागि आउने सवारी साधनसम्म फोहोर पुर्‍याउन, त्यसै सूचनामार्फत महानगरबासीमा अनुरोध गरिएको छ ।’

सिसडोलमा बाटो निर्माण गर्ने भन्दै महानगरले साउन ४ मा एक साता फोहोर नउठाउने निर्णय गरेको थियो । महानगरले एक साता फोहोर नउठेएपछि फोहोर व्यवस्थापन गरिदिने महानगरवासीमा धन्यवादसमेत व्यक्त गरेको छ ।

‘महानगरपालिकाद्वारा साउन ४ मा जारी गरिएको सूचनाबमोजिम आफ्नो घरभित्र फोहोरको अल्पकालीन व्यवस्था गरी सडक, चोक, गल्ली फोहोर हुनबाट रोकी सफा, स्वच्छ महानगर बनाउने कार्यमा अतलुनीय योगदान गर्नुभएकोमा महानगरवासीलाई हार्दिक धन्यवाद’, सूचनामा भनिएको छ । महानगरले फोहोर सार्वजनिक स्थान तथा चोकमा नराखी घरमै छुट्याएर राख्नसमेत अनुरोध गरेको थियो ।