काठमाडौं । शुक्रबारदेखि नेवाः समुदायमा पनि विशेषतः बौद्ध धर्मावलम्बीहरुले मनाउने गुँला पर्व सुरु भएको हो । यो पर्व करिब १ महिनासम्म चल्छ ।

नेपाल भाषामा ‘गुँ’ को अर्थ नवौं र ‘ला’ को अर्थ महिना अर्थात नवौं महिना हो । गुँला पर्वको महिना बिहान सबेरै स्वयम्भू महाचैत्यमा पुगेर दर्शन गरेपछि शोभा भगवती हुँदै विजयेश्वरी र त्यहाँबाट केलटोलस्थित सेतो मत्स्येन्द्रनाथ दर्शन गर्न जाने गरिएको छ । साउन शुक्ल प्रतिपदादेखि एक महिनासम्म मनाइने यस गुँला पर्वमा सांस्कृतिक बाजागाजाका साथ बुद्ध भगवानको भजन कीर्तन गाएर मठमन्दिर, बौद्ध चैत्य परिक्रममा गरिन्छ ।

उक्त परिक्रमाको समयमा राँगाको सिङबाट बनाइएको ‘न्याकुँ’ बाजा बजाइन्छ । साथै, दाफा, धाः, बाँसुरी, धिम, भुस्यालगायत नौ बाजा बजाउने गरिन्छ । धार्मिक दृष्टिकोणले यस पर्वसँगै रक्षाबन्धन, नाग पञ्चमी, पञ्चदान, गाईजात्रा, मतःयाः, देवपत्तनमा खड्गजात्रा, कृष्णाष्टमी, बाबुको मुख हेर्ने पर्वहरु आउँछन् ।