भक्तपुर अस्पतालको सुपरिटेन्डेन्टमा पुनः डा सुमित्रा गौतम नियुक्त

भक्तपुर । भक्तपुर अस्पताललाई नमूना अस्पताल बनाउन भूमिका खेलेकी डाक्टर सुमित्रा गौतम पुनः मेडिकल सुपरिटेन्डेन्टमा नियुक्त भएकी छन् । बागमती प्रदेश सरकार स्वास्थ्य मन्त्रालय अन्तर्गतको सो अस्पतालको प्रमुख पदको रुपमा रहेको मेडिकल सुपरिटेन्डेन्टमा डाक्टर सुमित्रा गौतम पुनः नियुक्त भएकी हुन् । उनलाई बुधबार भक्तपुर अस्पताल विकास समितिका अध्यक्ष मिलन सुवालले स्वागत गरे ।

उनले पदभार सम्हालेसँगै अस्पताललाई उत्कृष्ट बनाउने योजना रहेको उनले प्रतिक्रिया दिइन् । उनले आजै अस्पताल व्यवस्थापन समितिको बैठक समेत बसिएको जानकारी दिँदै बालबालिकाको ओपिडी निःशुल्क गर्ने निर्णय गरिएको बताइन् । बैठकमा बेवारिशे लास तथा बेवारिशे व्यक्तिका उपचार निःशुल्क गर्ने विषयमा व्यवस्थापन समितिका पदाधिकारीबीच छलफल भएको छ ।

केही समयअघि उनलाई सो अस्पतालबाट अन्यत्र सरुवा गरिएको थियो । उनको सरुवासँगै जनताहरुले उनलाई सरुवा गर्न नहुने धारणा राख्दै आएका थिए । डाक्टर गौतमलाई हाल निमित्त प्रमुख मेडिकल सुपरिटेण्डेटको जिम्मेवारी दिएको स्वास्थ्य मन्त्रालयले जनाएको छ।