यूएईलाई पराजित गर्दै नेपाल एसिया कपमा, अबको प्रतिस्पर्धी भारत र पाकिस्तान

काठमाडौं । नेपाल आगामी सेप्टेम्बरमा हुने एशिया कपमा छनोट भएको छ । एसीसी प्रिमियर कपको उपाधि जित्दै नेपाल एशिया कपमा छनोट भएको हो । कीर्तिपुरस्थित त्रिवि मैदानमा भएको फाइनलमा नेपालले यूएईलाई ७ विकेटले पराजित गरेको हो ।

यूएईले दिएको ११८ रनको विजय लक्ष्य नेपालले ३०.३ ओभरमा पूरा गरेको हो । गुलसन झा र भीम सार्कीले विजयी बनाउन महत्वपूर्ण योगदान दिए । झाले ६७ र सार्कीले ३६ रनको योगदान दिए । आरिफ शेखले ८ रन बनाए भने कुशल भुर्तेल र रोहित पौडेलले खाता खोल्न सकेनन् ।

वैशाख १८ गते नेपालले टस जितेर यूएईलाई ब्याटिङको निम्तो दिएको थियो । वर्षाका कारण खेल अवरुद्ध हुनुअघि यूएईले २७.३ ओभरमा ९ विकेट गुमाएर १०६ रन जोडेको थियो । नेपाली बलर चम्किएको खेलमा यूएईले ११७ रन मात्र बनाउन सकेको थियो ।

यो जितसँगै नेपालले सेप्टेम्बरमा पाकिस्तानमा हुने एसिया कपमा स्थान बनाएको छ । एसिया कपमा पाकिस्तान र भारत रहेको समूहमा नेपाल रहेको छ । यससँगै नेपालले पहिलो पटक यी दुई टेस्ट टिमसँग प्रतिस्पर्धा गर्ने अवसर बनाएको छ ।