काठमाडौं । अभिनेत्री प्रियंका कार्कीले सासूलाई ओठमा चुम्बन गरेको तस्बिर पोस्ट गर्दै उनलाई आफ्नो प्रेमिका भएको बताएकी छन् । सासू रबिना देशराज श्रेष्ठको अदालती विवाहको क्रममा खिचिएको तस्बिर पोस्ट गर्दै प्रियंकाले आफ्नो सासूको प्रशंसा गरेकी हुन् ।
सामाजिक सञ्जालमा सासूको नयाँ वैवाहिक जीवनका लागि असाध्यै खुसी भएको समेत उनले बताएकी छन् । उनले सुरुमै सासूलाई रामन्था भनेर सम्बोधन गरेकी छिन् । सासूलाई रामन्था भन्नुमा सानो कथा पनि प्रियंकाले बताएकी छन् ।
उनी लेख्छिन्, ‘तपाईंलाई सुरुमा मेन्टर (हाम्रो भेट सम्भवतः मेगा बैंकमार्फत् भयो), त्यसपछि मेरो प्रेमीकी आमा (असाध्यै कुल) र त्यसपछि सासू र मेरी प्रेमिकाको रूपमा चिन्न पाउनु एक सुन्दर यात्रा हो ।’
उनी थप्छिन्, ‘यत्तिका वर्ष सँगै बिताइसकेपछि म पूर्ण आत्मविश्वासका साथ भन्न सक्छु कि तपाईंको आत्मा निकै सुन्दर छ । म तपाईंको मुटुले दिने निस्वार्थ माया, न्यानो अँगालो र चुम्बनलाई चिन्दछु ।’
‘तपाईंले जीवनको यो नयाँ अध्याय सुरु गर्दा म कति खुसी छु र कति पटक खुसीको आँसु झारेकी छु भन्ने कुरा भगवानलाई थाहा छ । तपाईंले आफू योग्य वर पाउनुभएको छ, उहाँले तपाईं खुसी बनाएको, तपाईंका दिनहरू उजिल्याएको र जीवनमा बहार ल्याएको देखेकी छु । ’
‘मेरी आमा, तपाईं यी सबै खुसीको हकदार हुनुहुन्छ । म तपाईंका खुसीका दिन हेर्न, सबै साहसिक कार्यहरू सुन्न, सुन्दर तस्बिरहरू हेर्न र यो अति सुन्दर सम्बन्धको जादु महसुस गर्न प्रतीक्षारत छु ।’
उनले अन्तिममा लेखेकी छिन्, ‘ओह मम्सी, म असाध्यै दङ्ग छु । तपाईंका लागि धेरै खुसी पनि । म तपाईंलाई असाध्यै माया गर्छु ।’ पूर्व बैंकर समेत रहेकी रबिना देशराज श्रेष्ठले केही समय अघि बेलायती प्रेमी स्टुअर्ट च्यापम्यानसँग नेपाली परम्परा अनुसार विवाह गरेकी थिइन् ।
