कुवेतलाई हराउँदै नेपाल एसीसी महिला प्रिमियर कपको सेमिफाइनलमा प्रवेश

काठमाडौं । नेपाल मलेसियामा जारी एसीसी महिला प्रिमियर कपको सेमिफाइनलमा प्रवेश गरेको छ। आज भएको क्वाटरफाइलमा कुवेतलाई ८ विकेटले पाखा लगाउँदै नेपाल सेमिफाइनमा पुगेको हो ।

खराब मौसमका कारण १२ ओभरमा झारिएको खेलमा कुवेतले दिएको ५० रनको लक्ष्य नेपालले ७ अ‍ोभरमा २ विकेट गुमाएर पूरा गर्यो । नेपालका लागि सीता रानाले १७ रन जोड्दा कप्तान इन्दू बर्मा २२ तथा कविता कुँवर ४ रनमा अविजित रहिन् । नेपालले अब जापान र मलेसियाबीचको विजेतासँग फाइनल प्रवेशका लागि खेल्नेछ ।

नेपाली टोली प्रारम्भिक चरणमा तीनवटै खेल जित्दै समूह ‘डी’ को विजेताका रुपमा क्वार्टरफाइनलमा पुगेको हो । नेपालले आफ्नो पहिलो खेलमा हङ्कङलाई आठ विकेटले हराएको थियो ।

दोस्रो खेलमा नेपालले भुटानलाई पनि आठ विकेटले पराजित गरेको थियो । नेपालले आफ्नो तेस्रो खेलमा माल्दिभ्समाथि दुई सय १४ रनको कीर्तिमानी जित हासिल गरेको थियो । एसियाली क्रिकेट काउन्सिल (एसीसी) ले महिला प्रिमियर कप पहिलो पटक आयोजना गरेको हो ।