आफ्ना सन्तानले जस्तोसुकै अपराध गरेपनि त्यो अपराधबाट जोगाउन खोज्ने धेरै बाबु देखिएका छन् । तर अदालतले दोषि ठहर गरेर फरार भएको छोरालाई समातेर सजाय दिलाउन आफैँ अदालतमा पुर्‍याउने बाबु भने हम्मेसी भेटिँदैनन् ।

रामेछापमा त्यस्ता बाबु भेटिएका छन्, जसले आफ्नो छोरालाई कारागार चलान गर्नका लागि च्याप्प समातेर जिल्ला अदालतमा जिम्मा लगाएका छन् । सैपु- २ का सुदन सुनुवारले चोरी गरेको अभियोगमा अदालतबाट दाषि ठहर गरेका आफ्ना २१ वर्षीय छोरा शुभराज सुनुवारलाई सजाय दिलाउनका लागि रामेछाप जिल्ला अदालतमा पेश गरेका हुन् । एक साता अघि जिल्ला अदालतले उनलाई तीन बर्ष अघि ओखलढुंगा जिल्लामा भएको चोरी घटनामा संलग्न भएको अभियोगमा पुनारावेदन अदालत राजविराजले ०७१ पुसमा सुनुवारलाई ४ बर्ष ९ दिन कैद हुने फैसला गरेको थियो । उक्त फैसला कार्यान्वयनका लागि रामेछाप जिल्ला अदालतमा मिसिल आएपछि सुनुवारलाई प्रहरीले खोजविन गरेको उनका बाबु सुदनले थाहा पाएका थिए ।

फैसला हुनु अघि देखि नै भारतमा बसेका उनका छोरा घर आएको मौका पारेर जिल्ला सदरमुकाम मन्थली झरेका सुदन सुनुवारले जिल्ला अदालतमा पुगेर छोराको सजायका बारेमा वुझेका थिए । अदालतले छोराको सजाय सुनाउनुका साथै बुझाउन ल्याए २५ प्रतिशत पुरस्कार पाउने जानकारी गराएपछि उनी फर्केका थिए ।

जिल्ला अदालत रामेछापका तहसिलदार कृष्णप्रसाद घिमिरेका अनुसार अघिल्लो दिन अदालतबाट फर्केका सुनुवारले भोलिपल्टै छोरो जिम्मा लगाउन ल्याए । तर उनले अदालतले दिने पुरस्कार भने लिन मानेनन् ।’ अर्काको भए लिन्थे, आफ्नै छोराको लिन्न भनेर उनी छोरा जिम्मा लगाएर फर्के । बाबुले समातेर अदालत वुझाएका शुभराज भने रामेछाप कारागार चलान भएको घिमिरेले वताए । अदालतले सजाय सुनाएको दोषिलाई पक्राउ गरी वुझाउनेलाई २५ प्रतिशत पुरस्कार हुने कानुनी व्यवस्था छ । उक्त पुरस्कार जेल भुक्तान र जरिवाना दुवैमा पाइन्छ ।
कान्तिपुरबाट