संघीय गठबन्धनले भोलिदेखि राजधानीकेन्द्रित आन्दोलन थाल्ने

संघीय गठबन्धनले शनिबारदेखि राजधानीकेन्द्रित आन्दोलन थाल्ने घोषणा गरेको छ । शुक्रबार संघीय समाजवादी फोरम मूख्यालय तीनकुनेमा आयोजित पत्रकार सम्मेलनमा अध्यक्ष उपेन्द्र यादवले यसको घोषणा गरेका हुन ।
उनले ३६ पटक वार्ता गरेको तर सरकार ३६ मिलिमिटर पनि संवेदनशील भएर अघि नबढेको आरोप लगाउँदै त्यसै कारण आफूहरु आन्दोलनमा जान बाध्य भएको दावी गरे ।
यादवल अब वार्ता नभई आन्दोलनबाट मात्रै निकास आउने दावी गर्दै सरकारलाई वार्तावरोधी भएको आरोप लगाए ।
उनले आफूहरुको आन्दोलन पूर्ण रूपमा शान्तिपूर्ण तथा अहिंसात्मक हुने स्पष्टपार्दै सरकारको तर्फबाट विगतका आन्दोलनहरूमा जस्तै यसलाई हिंसात्मक मोड दिने सम्भावनाबारे आफूहरु सचेत भएको बताए ।
पत्रकार सम्मेलनमा जारी बक्तब्यमा भनिएको छ,‘सरकारले जनताको आन्दोलनमाथि दमन गरी बल प्रयोग गरेमा यसका कारण देशमा दिर्घकालीन सङ्घर्ष र गृहयुद्धको स्थिति सृजना हुन सक्दछ । त्यस्तो स्थिति उत्पन्न भएमा यस्को सम्पूर्ण जिम्मेवारी सरकारकै हुने कुरा हामी चेतावनी दिन चाहन्छौं ।’

गठबन्धनले शनिबार अपराह्न ३ बजे रत्नपार्क शान्तिबाटिकाबाट प्रदर्शन थाल्ने निर्णय गरेको छ । त्यस्तै आइतबारदेखि हरेक दिन सिंहदरबार घेराऊ राखेको छ । गठबन्धनले कालाबजारीया, भ्रष्टाचारीलाई कारवाही हुनुपर्ने, सुलभ ढंगले डिजेल, पेट्रोल र ग्यास उपलब्ध गराउनपर्ने, भूकम्प पीडितलाई पुनर्स्थापना गराउनुपर्ने, यसअघि आन्दोलनकारीहरूसग गरिएका सम्झौता लागु गराउनुपने माग गरेको छ ।
२७ दलीय गठबन्धनमा एमाओवादी स्थायी समिति सदस्य गोपाल किराती संयोजक रहेको किरात राज्य सङ्घर्ष समिति, र राष्ट्रिय दलित मुक्ति आन्दोलन थपिएका छन् ।