नयाँदिल्ली । भारतको गुजरातमा पुल दुर्घटनामा परी मृत्यु हुनेको संख्या १५ पुगेको छ ।
एनडीआरएफको खोजी अभियानमा आज बिहान दुईवटा शव फेला परेका छन् । सोही क्रममा चार जना अझै बेपत्ता छन् । उद्धार कार्य जारी छ।
दुर्घटनामा एकै परिवारका तीन जनाको मृत्यु भएको छ । रमेशभाई (बुवा), नैतिक (छोरां) र वेदिका (छोरी) भावनगरको बगदाना जाँदै थिए। तीनै जनाको आजै अन्तिम संस्कार गरिएको छ ।
वडोदराको महिसागर नदीमा बनेको पुल बुधबार बिहान भाँचिएको हो । पुल भत्किँदा दुई ट्रक, दुई कार र एक रिक्सा नदीमा खसेका थिए । त्यही क्रममा एउटा ट्याङ्कर भाँचिएको छेउमा अड्किएको थियो । नदीमा डुबेका ८ जनाको स्थानीयले उद्धार गरेका थिए भने १३ जनाको मृत्यु भएको थियो ।
यो ४५ वर्ष पुरानो पुलले दक्षिण गुजरातलाई सौराष्ट्रसँग जोड्छ। पुल भत्किएपछि भरुच, सुरत, नवसारी, तापी र वलसाड जस्ता सहरबाट सौराष्ट्र पुग्न अझै समय लाग्ने छ । अब यसका लागि अहमदाबाद हुँदै जानुपर्छ ।
प्रधानमन्त्री नरेन्द्र मोदीले दुर्घटनामा शोक व्यक्त गर्दै प्रधानमन्त्री राष्ट्रिय राहत कोषबाट मृतकका परिवारलाई २ लाख रुपैयाँ र घाइतेहरूलाई ५० हजार रुपैयाँ दिने घोषणा गरेका छन्।
