काठमाडौं । अमेरिकाको लुइजियाना राज्यमा भएको एक कार दुर्घटनामा दुई जना नेपाली युवा विद्यार्थीको ज्यान गएको छ । लुइजियाना टेक विश्वविद्यालयमा अध्ययनरत २२ वर्षीय राजन यादव र २० वर्षीय रोजिन ओलीको उक्त दुर्घटनामा मृत्यु भएको अमेरिकी सञ्चारमाध्यमहरूले जनाएका छन् ।

दुर्घटना स्थानीय समयअनुसार असार २९ गते राति करिब ९ बजे भएको हो । लुइजियाना राज्य प्रहरीका अनुसार यादवले चलाएको कार भीषण वर्षाका कारण सडकमा चिप्लिएर रूखमा ठोक्किएपछि आगलागी भएको थियो । घटनास्थलमै यादव र ओलीको ज्यान गएको प्रहरीले पुष्टि गरेको छ ।

अन्य दुई घाइते, उपचार जारी
दुर्घटनाको बेला सो कारमा रोजिन ओलीसहित अन्य दुई जना पनि सवार थिए, जसमा घाइते भएका दुई जनाको स्थानीय अस्पतालमा उपचार भइरहेको जनाइएको छ । घाइतेहरूको नाम र अवस्था सार्वजनिक गरिएको छैन ।

मृतकको नेपाली ठेगाना खुल्न सकेन
राजन यादव र रोजिन ओली दुवै नेपालका नागरिक भएको पुष्टि भएपनि हालसम्म उनीहरूको स्थायी नेपाली ठेगाना सार्वजनिक गरिएको छैन । अमेरिकी प्रहरीले घटना सम्बन्धमा विस्तृत अनुसन्धान गरिरहेको जनाएको छ ।

विश्वविद्यालयको श्रद्धाञ्जली
दुर्घटनापछि लुइजियाना टेक विश्वविद्यालयले शोक वक्तव्य जारी गर्दै दिवंगत विद्यार्थीहरू प्रति श्रद्धाञ्जली अर्पण गरेको छ । विश्वविद्यालयका अध्यक्ष जिम हेन्डरसनले आफ्नो आधिकारिक फेसबुकमार्फत दुस्ख व्यक्त गर्दै लेखेका छन्, “हामीले हेरचाहलाई मूल्यवान आदर्शको रूपमा अँगालेका छौं । सधैं एकअर्काको हेरचाह गरिरहनुहोस् ।”

विश्वविद्यालयले हालका विद्यार्थीहरूलाई परामर्श सेवा र मानसिक स्वास्थ्य सहायता उपलब्ध गराएको जानकारी दिए । यता, नेपाली समुदाय र विद्यार्थी संगठनहरूले पनि गहिरो दुःख व्यक्त गर्दै परिवारजन प्रति समवेदना प्रकट गरेका छन् ।

शव व्यवस्थापन र नियोगको भूमिका
मृतकहरूको शव व्यवस्थापन तथा नेपाल फिर्ती प्रक्रिया सम्बन्धमा हालसम्म नेपाली नियोग वा दूतावासको औपचारिक प्रतिक्रिया आउन बाँकी रहेको छ । घटना सार्वजनिक भएपछि अमेरिकास्थित नेपाली विद्यार्थीहरूमा पनि शोक र चिन्ता व्यक्त गरिएको छ ।