काठमाडौं । नेपाल ‘ए’ ले दोस्रो अभ्यास ट्वान्टी-२० खेलमा जीत हासिल गरेकाे छ । घरेलु टोली आसाम प्रदेश क्रिकेट संघविरुद्ध ९६ रनको सज जित दर्ता गरेको छ ।
नेपालको जितसँगै पाँच खेलको शृंखला १-१ को बराबरीमा आएको छ । पहिलो खेलमा नेपाल डेकवर्थ लुइस पद्धति (डिएलएस) का आधारमा १५ रनले पराजित भएको थियो ।
शुक्रबार गुवाहटीमा नेपालले प्रस्तुत गरेको १७४ रनको लक्ष्य पछ्याएको आसाम १५.२ ओभरमा ७७ रनमै समेटियो ।
आसामका लागि रुहिनन्दन पेगुले १७, शिवशंकर रोयले १६ र आकाश सेनगुप्ताले १० रन बनाए ।
नेपालका लागि युवराज खत्रीले चार, बसिर अहमदले तीन तथा कमलसिंह ऐरी, आकाश चन्द र विवेककुमार यादवले समान एक विकेट लिए ।
टस जितेर ब्याटिङ रोजेको नेपालले निर्धारित २० ओभरमा सात विकेट गुमाउँदै १७३ रनको योगफल तयार पारेकाे थियाे ।
नेपालका लागि सन्दीप जोराले ३५, पवन सर्राफ र देव खनालले समान ३१, बसिर अहमदले २७, विवेकुमार यादवले अविजित २६ र आदिल आलम अन्सारीले १४ रन बनाए ।
आसामका लागि आकाश सेनगुप्ताले तीन, अभिनव चौधरीले दुई तथा आयुशमान मालाकार र अभिलश गोगोइले समान एक विकेट लिए ।
शृंखलाको तेस्रो खेल शनिबार हुनेछ ।
