विश्वकप छनोट : नेपाल आज सामोआसँग खेल्दै, उपाधि जित्ने अवसर

काठमाडौं । आईसीसी टी-२० विश्वकप एशिया छनोट तथा इस्ट प्यासिफिक छनोटको सुपर–सिक्समा आज नेपालले सामोआसँग खेल्दैछ । खेल नेपाली समयअनुसार दिउँसो सवा ४ बजे शुरु हुनेछ।

शीर्ष स्थानमा रहेको नेपाललाई आजको अन्तिम खेलसँगै टी-२० विश्वकप एशिया छनोट तथा इस्ट प्यासिफिक छनोटको उपाधि जित्ने अवसर छ । नेपालको चार खेलमा आठ अङ्क छ । दोश्रो स्थानमा रहेको यूएईले सबै पाँच खेल खेल्दै छ अङ्क बनाएको छ । चार खेल खेल्दै ओमान छ अङ्कसहित तेश्रो स्थानमा छ । ओमानले आज जापानसँग खेल्दैछ । नेपाल अहिलेसम्म प्रतियोगितामा अपराजित रहँदै अंकतालिकाको शीर्षस्थानमा छ ।

ओमानमा जारी टी-२० विश्वकप छनोट प्रतियोगिताको उपाधि जितेको खण्डमा राष्ट्रिय क्रिकेट टीमका खेलाडीहरूले जनही १९ लाख ५० हजार रुपैयाँ प्राप्त गर्ने छन् ।