१९ लाख नेपालीसँग सवारी लाइसेन्स

सवारीसाधनको संख्या तीव्र रुपमा वृद्धि भएसँगै सवारी चालक अनुमतिपत्र (लाइसेन्स) लिनेको संख्यासमेत बढ्दै गएको छ। हाल देशभर १९ लाख १९ हजार २९ सवारी चालक अनुमतिपत्र जारी भएका छन्। यो संख्या कम्प्युटरमा उतारिएको एकीकृत तथ्यांक हो। विगतमा लाइसेन्सको लगत प्रहरी कार्यालयले राख्ने हुँदा त्यो छुटेको हुनसक्ने यातायात व्यवस्था विभागले जनाएको छ।

कार्यालयहरुले पुराना लाइसेन्सको लगत व्यवस्थित गर्न नसक्दा तथ्यांक पूर्ण भने हुन सकेको छैन।तर, विगत केही वर्षदेखि विभागले सबै अञ्चल कार्यालयहरुलार्इ वितरण गिरिएको लाइसेन्सको तथ्यांक कम्प्युटरमा राख्ने व्यवस्था गर्न भनेको थियो। त्यसपछि अञ्चल कार्यालयहरुले नयाँ तथा नवीकरढ गर्न अाउने लाइसेन्सको तथ्यांक एकीकृत गर्न सुरु गरेका हुन्।

हाल एक पटक जारी भएको लाइसेन्सको अवधि ५ वर्ष हुने र उक्त लाइसेन्स अवधि सकिएको ५ वर्षसम्म नवीकरण नगरे स्वतः खारेज हुने व्यवस्था यातायात व्यावस्था ऐन २०४९ मा छ। विभागको तथ्यांक अनुसार सवैभन्दा धेरै लाइसेन्स बागमती अञ्चलबाट जारी भएको छ। बागमतीमा गत असारसम्ममा ७ लाख ७५ हजार ५७८ लाइसेन्स वितरण गरिएको छ। सवैभन्दा कम कर्णाली अञ्चलबाट ९८४ वटा लाइसेन्स जारी भएका छन्।

कारोबारबाट