कर्णेल कुमार लामाले पाए सफाई

काठमाडौं, २१ भदौ । द्वन्द्कालमा सर्वसाधरणलाई यातना दिएको अभियोगमा बेलयातमा मुद्दा खेपिरहेका नेपाली सेनाका कर्णेल कुमार लामाले अन्नत सफाई पाएका छन्। झन्डै साढे तीन वर्षदेखि यातना सम्बन्धि मुद्दा खेपिरहेका लामाको पक्षमा फैसला भएको छ ।

मंगलबार लन्डनस्थित सेन्ट्रल क्रिमिनल कोर्ट (फौज्दारी अदालत) ओल्ड बेलीमा कोर्ट नम्बर ६ मा जस्टीस स्वीनी नेतृत्वको इजलासले लामालाई निर्दोष सावित गर्दै मुद्दा टुंग्याएको हो । अभियोजन पक्षले लामालाई दोषी ठहर्‍याउन सक्ने पर्याप्त आधार नभएको भन्दै मुद्दा अघि नबढाउने निर्णय लिएपछि लामालाई निर्दोष सावित गर्दै मुद्दा टुंग्याएको हो ।

गत महिना करिब सात हप्ताको सुनुवाइपछि लामाले यातना सम्वन्धि दुई मध्ये करम हुसेनको मुद्दामा सफाइ पाएका थिए ।

लामामाथि बेलायती क्रिमिनल जस्टिस एक्ट १९८८, १३४ (१) अन्तर्गत मुद्दा चलाइएको थियो । दक्षिण सुडानस्थित संयुक्त राष्ट्रसंघको शान्ति सेनामा खटिएका बेला छुट्टिमा परिवार भेटन बेलायत जाँदा सन् २०१३ जनवरी ३ मा लामालाई लन्डन मेट्रोपोलिटन प्रहरीले पक्राउ गरेको थियो।

लामाले ११ वर्षअघि कपिलवस्तु जिल्लाको गोरुसिंगेस्थित एक सैनिक व्यारेकमा थुनामा रहेका जनकबहादुर राउत र करम हुसेनलाई यातना दिएको अभियोग लागेको थियो ।