काठमाडौं, १४ असोज । नयाँ शक्ति नेपालले प्रधानमन्त्री प्रचण्डको भारत भ्रमणका क्रममा जारी भएको २५ बुँदे संयुक्त वक्तव्यको विरोध गर्दै आज धर्ना गरेको छ ।
शुक्रबार काठमाडौंको भद्रकालीमा पार्टीका संयोजक डा. बाबुराम भट्टराईको नेतृत्वमा धर्ना भएको हो । राष्ट्रघात र प्रतिगमनको खतराविरुद्ध भन्दै गरिएको धर्नामा संयोजक डा. भट्टराईसहितका शीर्ष नेताहरुको सहभागीता रहेको छ ।
प्रधानमन्त्री प्रचण्डले भारत भ्रमणको बेला नेपाल–भारतवीच भएको २५ बुँदे संयुक्त हस्ताक्षरको ७, १०, ११, १२, १३, १४ र २० नम्बर बुँदा आपत्तिजनक रहेको भन्दै नयाँ शक्तिले ११ नम्बरको बुँदाले नेपाललाई भुटानीकरण गरेको आरोप लगाएको छ ।
धर्नालाई सम्बोधन गर्दै संयोजक डा. भट्टराईले उक्त सम्झौताहरु कार्यान्वयन भए नेपाल भुटानीकरण बन्ने खतरा रहेको औंल्याए । उनले अघि थपे, ‘यो राष्ट्रघात हो यसले स्वाभिमानी नेपालको शिर झुकाएको छ ।’
त्यस्तै नयाँ शक्ति पार्टीले प्रमुख तीन दलवीच ईलाकालाई नै स्थानीय तह बनाउने सहमतिको पनि कडा विरोध गरेको छ । उसले भनेको छ,‘ तीन दलको सहमति प्रतिगामीे छ, यो सच्याउनुपर्छ ।’
