बिर्तामोड । झापाको क्रिएटिभ नेपलिज युथ नामक संस्थाले चौथो बार्षिक उत्सवको अवसरमा बिद्यार्थीलाई शैक्षिक सामाग्री वितरण गरेको छ । बिर्तामोड नगरपालिका वडा नं. ९ स्थित श्री सहिद लक्ष्मी प्राथमिक बिद्यालयमा अध्ययनरत बिद्यार्थीलाई बुधवार खेलकूद तथा स्टेशनरी सामाग्री वितरण गरेको हो ।

बिद्यालयका एलकेजीदेखि कक्षा ५ सम्मका एकसय १५ जना बिद्यार्थीलाई सो सामाग्री वितरण गरेको क्रिएटिभ नेपलिज युथ झापाका अध्यक्ष टिकाराम धमलाले जानकारी गराए । २० हजार मूल्य बराबरको कपि, पेन्सिल, इरेजर, साप्नर, कलर पेन्सिल, स्केच पेन, डटपेन, फुटवल, ब्याटमिन्टन जस्ता सामाग्री बिद्यार्थीलाई वितरण गरेको कार्यक्रम संयोजक एलिस तिवारीले बताए । युथका अध्यक्ष धमलाको अध्यक्षतामा कार्यक्रम सम्पन्न भएको थियो ।

कार्यक्रममा आयोनका प्रदेश सदस्य यक्षराज कडरिया, स्प्रीङडेल कलेज फर होटल मेनेजमेन्टका सञ्चालक निरज श्रेष्ठ, बिद्यालयका प्रधानाध्यापक विरेन्द्र बुढाथोकीलगायतको उपस्थिति रहेको थियो । कार्यक्रमको सञ्चालन संस्थाकी कोषाध्यक्ष अस्मिता पराजुलीले गरेकी थिइन् ।

अघिल्लो वर्षसम्म २७ जना मात्र बिद्यार्थी रहेको बिद्यालयमा हाल एकसय ६५ जना बिद्यार्थी रहेको बिद्यालय व्यवस्थापन समितिका अध्यक्ष चम्लागाईले बताए । बिद्यालयमा विद्यार्थीको अवस्था जिर्ण भएको देखेर एजुकेशन क्याम्पीनर अर्जुन भट्ट र उनकी श्रीमती कमला भट्टले बिद्यालयलाई नमुना बिद्यालय बनाउने अठोट गरेर बिद्यालयको स्तरोउन्नती गर्दै विद्यार्थीको संख्या वढाएको अध्यक्ष चम्लागाईले बताए ।

उनीहरुले बिद्यालयलाई निःशुल्क रुपमा सहयोग गर्दै आएको स्थानीयको भनाई छ । भट्टले नमुना बिद्यालय वनाएर नगरपालिकालाई हस्तान्तरण गर्ने बताए ।