भूकम्प गएको पाँच वर्षपछि मात्र बस्ती हस्तान्तरण

गोरखा: भूकम्प गएको पाँच वर्षपछिकाे अन्तरालमा लाप्राकका भूकम्पपीडितले भूकम्प प्रतिरोधी घर पाएका छन् । भूकम्पपीडितलाई हस्तान्तरण गर्ने भनिए पनि करीब पाँच वर्षपछि मात्र बस्ती हस्तान्तरण गरिएको हो । गोरखाको धार्चे गाउँपालिका-४ स्थित लाप्राकले २०७२ भूकम्पबाट ठूलो क्षति भोगेको थियो । हाल लाप्राकको गुप्सीपाखामा निर्माण गरिएको एकीकृत नमूना बस्ती एक कार्यक्रमकाबीच भूकम्पपीडितलाई हस्तान्तरण गरिएको छ ।

गैर आवासीय नेपालीसङ्घ ,एनआरएनएले उक्त बस्ती निर्माण गरेको हो ।राष्ट्रिय पुनर्निर्माण प्राधिकरण का प्रमुख सुशील ज्ञवाली, गोरखा क्षेत्र नं १ का सांसद हरिराज अधिकारी, लगायतको उपस्थितिमा एनआरएनएका अध्यक्ष कुमार पन्तले भूकम्प पीडितलाई लालपुर्जा थमाएर बस्ती हस्तान्तरण गरेका छन् । पाँच सय ७३ घरधुरी रहेको एकीकृत नमूना बस्ती १८ दशमलव ३२ हेक्टर क्षेत्रफलमा फैलिएको छ ।

एक परिवारका लागि करीब तीन आना तीन पैसा जग्गा परेको नमूना बस्तीमा प्रत्येक घर चार कोठे र दुई तलाका बनाइएका छन् भने प्रत्येक घरका लागि छुट्टै शौचालयसमेत निर्माण गरिएको छ । बस्ती निर्माणका लागि अहिलेसम्म करीब ५७ करोड ६६ लाख रुपैयाँ खर्च भएको एनआरएनएले जनाएको छ । उक्त बस्ती निर्माणका लागि एनआरएन र राष्ट्रिय पुनर्निर्माण प्राधिकरण तथा शहरी विकास मन्त्रालयबीच २०७३ साल वैशाख १२ गते त्रिपक्षीय सम्झौता भएको थियो ।